រដ្ឋមន្ត្រីការបរទេសអេហ្ស៊ីប លោក Badr Abdelatty និងសមភាគីលីបង់ លោក Abdallah Bou Habib កាលពីថ្ងៃសុក្រ បានពិភាក្សាអំពីការវិវឌ្ឍចុងក្រោយបង្អស់ នៅក្នុងប្រទេសលីបង់ និងកិច្ចខិតខំប្រឹងប្រែងដែលបានធ្វើឡើង ដើម្បីទប់ស្កាត់ស្ថានការណ៍ដែលកាន់តែយ៉ាប់យ៉ឺន នៅក្នុងតំបន់។

ក្រសួងការបរទេសអេហ្ស៊ីប បាននិយាយនៅក្នុងសេចក្តីថ្លែងការណ៍មួយថា ក្នុងអំឡុងពេលសន្ទនាតាមទូរស័ព្ទ លោក Abdelatty បានពិនិត្យមើលកិច្ចខិតខំប្រឹងប្រែងរបស់ប្រទេសអេហ្ស៊ីប ដើម្បីឈានដល់បទឈប់បាញ់បន្ទាន់ នៅក្នុងប្រទេសលីបង់។

លោកបានសង្កត់ធ្ងន់ពីតម្រូវការក្នុងការបន្ធូរបន្ថយភាពតានតឹងដែលកំពុងកើនឡើង នៅដំណាក់កាលដ៏សំខាន់នេះ ដើម្បីទប់ស្កាត់តំបន់នេះពីការអូសទាញចូលទៅក្នុងសង្រ្គាមពេញទំហឹង ដែលនឹងមានផលប៉ះពាល់ដ៏គ្រោះថ្នាក់ខ្លាំងដល់សន្តិភាព និងសន្តិសុខក្នុងតំបន់ និងអន្តរជាតិ។ នេះបើយោងតាមសេចក្តីថ្លែងការណ៍។

ប្រមុខអ្នកការទូតអេហ្ស៊ីបរូបនេះ ក៏បានថ្កោលទោសផងដែរចំពោះចេតនារបស់កងទ័ពអ៊ីស្រាអែលដែលកំណត់គោលដៅរបស់កងកម្លាំងបណ្តោះអាសន្នរបស់អង្គការសហប្រជាជាតិនៅលីបង់ (UNIFIL) នៅភាគខាងត្បូងប្រទេសលីបង់។

លោក Abdelatty បានសង្កត់ធ្ងន់ទៅលើការខ្នះខ្នែងរបស់អេហ្ស៊ីប ក្នុងការបន្តផ្តល់ការគាំទ្រគ្រប់ទម្រង់ដល់ប្រទេសលីបង់ ដោយមើលឃើញពីកាលៈទេសៈដ៏ធ្ងន់ធ្ងរនាពេលបច្ចុប្បន្ន ដោយកត់សម្គាល់ថា រហូតមកដល់ពេលនេះ អេហ្ស៊ីប បានបញ្ជូនជំនួយចំនួន ៤៤តោន ទៅប្រទេសលីបង់។