បាល់ទាត់៖ លោកឧកញ៉ា ឬទ្ធី សំណាង ប្រធានក្លិបភ្នំពេញក្រោនកាលពីថ្ងៃទី១១ ខែតុលាម្សិលមិញ បានរៀបចំសកម្មភាពមនុស្សធម៌រួមជាមួយសប្បុរសជនជាច្រើនទៀតក្នុងការចុះសួរសុខទុក្ខ និងចែកអំណោយជាគ្រឿងឧបភោគបរិភោគដល់ប្រជាពលរដ្ឋចំនួន ១៤៣គ្រួសារដែលកំពុងរស់នៅក្នុងសហគមន៍ក្រីក្ររបស់អង្គការផ្កាយសមុទ្រ។
សកម្មភាពសប្បុរសធម៌របស់ក្លិបជោគជ័យជាងគេនៅលីគកំពូលកម្ពុជានេះ គឺតបតាមការសន្យារបស់ក្លិបក្រោមគំនិតផ្ដួចផ្ដើមរបស់លោកឧកញ៉ា ឬទ្ធី សំណាង និងសប្បុរសជនក្នុងការផ្ដល់ជូនរយៈពេល ៣ខែដល់ប្រជាពលរដ្ឋក្រីក្រដើម្បីជួយសម្រាលការលំបាក អំឡុងពេលនៃការរាតត្បាតជំងឺកូវីដ-១៩ បន្ថែមលើការផ្ដល់ចំណូលតាមរយៈការជួយទិញម៉ាស់ភ្នំពេញក្រោន ដែលកាត់ដេរដោយក្រុមស្ដ្រីក្រីក្រក្នុងសហគមន៍របស់អង្គការផ្កាយសមុទ្រ។
ទន្ទឹមជាមួយគ្នា ថ្នាក់ដឹកនាំក្លិបភ្នំពេញក្រោនក៏បានថ្លែងអំណរគុណចំពោះសប្បុរសជន ដែលបានចូលរួមសហការជាមួយក្លិបរួមមានក្រុមហ៊ុនដៃគូសហការរបស់ក្លិប ក៏ដូចជាមូលនិធិ Ueli Hofer Forderverein នៅប្រទេសស្វីសដែលបានគាំទ្រសកម្មភាពសប្បុរសធម៌របស់ក្លិប ដើម្បីជួយដល់ប្រជាពលរដ្ឋក្រីក្រក្នុងបរិបទកូវីដ-១៩ នេះផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
