ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអាទិត្យ (២០ តុលា) នេះថា រដ្ឋមន្ត្រីការបរទេសកូរ៉េខាងជើង បានលើកឡើងថា ក្រុមត្រួតពិនិត្យទណ្ឌកម្មពហុភាគីថ្មីដែលដឹកនាំដោយសហរដ្ឋអាមេរិក គឺជាក្រុម “ខុសច្បាប់ និងផ្ទុយពីច្បាប់ទាំងស្រុង”។

សហរដ្ឋអាមេរិក កូរ៉េខាងត្បូង និងជប៉ុន កាលពីថ្ងៃពុធសប្ដាហ៍មុន បានប្រកាសចាប់ផ្តើមក្រុមចម្រុះជាតិសាសន៍ថ្មីមួយដើម្បីត្រួតពិនិត្យការអនុវត្តទណ្ឌកម្មប្រឆាំងនឹងកូរ៉េខាងជើង បន្ទាប់ពីរុស្ស៊ី និងចិន បានរារាំងសកម្មភាពត្រួតពិនិត្យនៅអង្គការសហប្រជាជាតិ។

ក្រុមនេះត្រូវបានណែនាំបន្ទាប់ពីរុស្ស៊ី កាលពីខែមីនា បានច្រានចោលការបន្តជាប្រចាំឆ្នាំនៃក្រុមអ្នកជំនាញរបស់អង្គការសហប្រជាជាតិ ដែលបានត្រួតពិនិត្យការអនុវត្តទណ្ឌកម្មរយៈពេល ១៥ឆ្នាំមកហើយ ដែលមានបំណងទប់ស្កាត់កម្មវិធីនុយក្លេអ៊ែរ និងមីស៊ីលរបស់កូរ៉េខាងជើង។ 

ភាពតានតឹងនៅឧបទ្វីបកូរ៉េ កាន់តែតានតឹងក្នុងប៉ុន្មានឆ្នាំចុងក្រោយនេះ ជាមួយនឹងកូរ៉េខាងជើង បង្កើនការអភិវឌ្ឍន៍ជាបន្តបន្ទាប់នៃមីស៊ីលបាលិស្ទិក និងឃ្លាំងអាវុធនុយក្លេអ៊ែរ ដោយទាក់ទាញទណ្ឌកម្មអន្តរជាតិ និងបង្កើតទំនាក់ទំនងយោធាជិតស្និទ្ធជាមួយរុស្ស៊ី។ 

ជាមួយគ្នានោះ ទីក្រុងវ៉ាស៊ីនតោន ក៏បាននិងកំពុងពង្រឹងកិច្ចសហប្រតិបត្តិការផ្នែកសន្តិសុខជាមួយសម្ព័ន្ធមិត្តសំខាន់ៗក្នុងតំបន់គឺកូរ៉េខាងត្បូង និងជប៉ុនផងដែរ៕