នាវាចម្បាំងរបស់សហរដ្ឋអាមេរិក និងកាណាដា បានធ្វើដំណើរឆ្លងកាត់ច្រកសមុទ្រតៃវ៉ាន់ដ៏រសើបជាមួយគ្នាកាលពីថ្ងៃអាទិត្យ (២០ តុលា) តិចជាងមួយសប្តាហ៍បន្ទាប់ពីប្រទេសចិន បានធ្វើហ្គេមសង្គ្រាមជុំថ្មីជុំវិញកោះនេះ ដោយទីក្រុងប៉េកាំង បានរិះគន់បេសកកម្មឆ្លងកាត់នេះថាជាការរំខាន។

កងទ័ពជើងទឹកសហរដ្ឋអាមេរិក ម្តងម្កាលអមដោយនាវាមកពីប្រទេសសម្ព័ន្ធមិត្ត ឆ្លងកាត់ច្រកសមុទ្រនេះប្រហែលមួយខែម្តង។ ចិន ដែលអះអាងសិទ្ធិលើកោះស្វ័យគ្រប់គ្រងតៃវ៉ាន់ ថាជាទឹកដីរបស់ខ្លួន និយាយថា ផ្លូវទឹកយុទ្ធសាស្ត្រនេះក៏ជាកម្មសិទ្ធិរបស់ខ្លួន។

កងនាវាចរទី៧ របស់កងទ័ពជើងទឹកសហរដ្ឋអាមេរិក បាននិយាយនៅថ្ងៃចន្ទ (២១ តុលា) នេះថា នាវាពិឃាត យូអេសអេស ហ៊ីហ្គីន (USS Higgins) និងនាវាចម្បាំងកាណាដា អេចអ៊ឹមស៊ីអេស វេនខូវើ (HMCS Vancouver) បានធ្វើការឆ្លងកាត់ “ជាទម្លាប់" កាលពីថ្ងៃអាទិត្យ "តាមដែនទឹកដែលសេរីភាពនៃការធ្វើនាវាចរណ៍ និងការហោះហើរលើសមុទ្រ ត្រូវបានអនុវត្តស្របតាមច្បាប់អន្តរជាតិ"។

កងនាវាចរអាមេរិកបានបន្ថែមនៅក្នុងសេចក្តីថ្លែងការណ៍មួយថា ការឆ្លងកាត់នេះបានបង្ហាញពីការប្តេជ្ញាចិត្តរបស់សហរដ្ឋអាមេរិក និងកាណាដា ក្នុងការលើកកម្ពស់សេរីភាពនៃការធ្វើនាវាចរណ៍សម្រាប់ប្រទេសទាំងអស់។ បញ្ជាការភាគខាងកើតរបស់ប្រទេសចិន បាននិយាយថា កងកម្លាំងរបស់ខ្លួនបានត្រួតពិនិត្យ និងព្រមាននាវាទាំងនោះ៕