យោងតាមក្រុមអ្នកសរសេរប្លុកដែលគាំទ្ររុស្ស៊ី បាននិយាយថា កងកម្លាំងទីក្រុងមូស្គូ កំពុងប្រយុទ្ធយ៉ាងខ្លាំងក្លាពីផ្លូវមួយទៅផ្លូវមួយជាមួយកងទ័ពអ៊ុយក្រែន នៅជាយទីប្រជុំជន សេលីដូវ៉េ (Selydove) ភាគខាងកើតអ៊ុយក្រែន ខណៈកងកម្លាំងរុស្ស៊ី កំពុងព្យាយាមវាយរុញដើម្បីទទួលបានការគ្រប់គ្រងលើតំបន់ ដុនបាស (Donbas) ទាំងមូល។

យោងតាមទិន្នន័យបើកចំហរ បានឱ្យដឹងថា កងកម្លាំងរុស្ស៊ី ដែលលោកប្រធានាធិបតី វ្ល៉ាឌីមៀ ពូទីន បានបញ្ជាឱ្យបើកប្រតិបត្តិការពិសេសលើអ៊ុយក្រែន ក្នុងខែកុម្ភៈ ឆ្នាំ២០២២ បានវាយរុលយ៉ាងឆាប់រហ័សក្នុងខែកញ្ញា ក្នុងអត្រាលឿនបំផុតចាប់តាំងពីខែមីនា ឆ្នាំ២០២២ មក បើទោះជាអ៊ុយក្រែន បានកាន់កាប់ផ្នែកតូចមួយនៃតំបន់ ឃើស (Kursk) របស់រុស្ស៊ីក៏ដោយ។

កម្លាំងរុញច្រានដ៏ខ្លាំងក្លានៃការវាយរុលទៅមុខរបស់រុស្ស៊ីក្នុងរយៈពេលប៉ុន្មានខែថ្មីៗនេះ បានស្ថិតនៅក្នុងតំបន់ Donbas ភាគខាងកើតអ៊ុយក្រែន ដែលលោក ពូទីន និយាយថាលោកចង់ទទួលបានការគ្រប់គ្រងពេញលេញ។ ក្នុងប៉ុន្មានសប្តាហ៍ថ្មីៗនេះ រុស្ស៊ីបានឡោមព័ទ្ធទីក្រុងនានាក្នុងតំបន់ ដូណិត (Donetsk) ហើយបន្ទាប់មកបានបង្រួបបង្រួមបន្តិចម្តងៗ រហូតដល់អង្គភាពអ៊ុយក្រែន ត្រូវបានបង្ខំដកខ្លួនចេញ។

យោងតាមអ្នកសរសេរប្លុកបានឱ្យដឹងថា កងកម្លាំងរុស្ស៊ី កំពុងតែធ្វើដូចគ្នានេះក្នុងទីប្រជុំជន Selydove ដែលមានប្រជាជនមុនសង្គ្រាមសរុបប្រមាណជាង ២០.០០០នាក់។ អ្នកសរសេរប្លុកដែលគាំទ្ររុស្ស៊ីផ្សេងទៀតបានបង្ហាញវីដេអូនៃការបាញ់ផ្លោងយ៉ាងខ្លាំងក្លាលើតំបន់ Selydove មួយនេះ។ ក្រសួងការពារជាតិរុស្ស៊ី មិនទាន់បានធ្វើអត្ថាធិប្បាយអ្វីឡើយជុំវិញរឿងនេះ៕