ក្រុមប្រទេសមហាអំណាចទាំង៧បានសម្តែងការព្រួយបារម្ភអំពីសមយុទ្ធយោធាដ៏ធំនាពេលថ្មីៗនេះរបស់ប្រទេសចិននៅជុំវិញកោះតៃវ៉ាន់ក្នុងកិច្ចប្រជុំរដ្ឋមន្ត្រីការពារជាតិលើកដំបូងរបស់ខ្លួនដែលបានរៀបចំឡើងនៅទីក្រុង ណេផលស៍(Naples) ប្រទេសអ៊ីតាលី។

ក្នុងសេចក្តីថ្លែងការណ៍មួយដែលបានចេញផ្សាយបន្ទាប់ពីកិច្ចប្រជុំកាលពីចុងសប្ដាហ៍នេះ រដ្ឋមន្ត្រីមកពីប្រទេសជាសមាជិក G-7 បាននិយាយថា យើងមានការព្រួយបារម្ភចំពោះសកម្មភាពល្បែងសង្រ្គាម ដោយសំដៅទៅលើសមយុទ្ធរបស់ប្រទេសចិននៅជុំវិញកោះតៃវ៉ាន់ ដែលបានធ្វើឡើងកាលពីថ្ងៃចន្ទសប្ដាហ៍មុន។

សេចក្តីថ្លែងការណ៍បាននិយាយថា យើងបញ្ជាក់ជាថ្មីថា ការរក្សាសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ គឺមិនអាចខ្វះបានសម្រាប់សន្តិសុខ និងវិបុលភាពអន្តរជាតិ។

ក្រោយបង្ហាញការព្រួយបារម្ភយ៉ាងខ្លាំងរបស់ពួកគេអំពីស្ថានភាពនៅសមុទ្រចិនខាងកើត និងខាងត្បូង បណ្ដារដ្ឋមន្ត្រីក៏បាននិយាយផងដែរថា ប្រទេសរបស់ខ្លួនប្រឆាំងយ៉ាងដាច់ខាតចំពោះការរាំងស្ទះដល់សេរីភាពនាវាចរណ៍របស់ចិនដដែលៗ ការធ្វើសកម្មភាពយោធាលក្ខណៈជម្លោះ និងសកម្មភាពបង្ខិតបង្ខំ និងការគំរាមកំហែង ។

បណ្ដាមន្ត្រីរបស់ប្រទេសអង់គ្លេស កាណាដា បារាំង អាល្លឺម៉ង់ អ៊ីតាលី ជប៉ុន និងសហរដ្ឋអាមេរិក បូករួមទាំងសហភាពអឺរ៉ុប បានបញ្ជាក់ពីចេតនារបស់ខ្លួនក្នុងការពង្រីកការចូលរួមរបស់សមាជិក G-7 នៅក្នុងសមយុទ្ធក្នុងតំបន់ និងពង្រឹងកិច្ចសហប្រតិបត្តិការប្រតិបត្តិការឱ្យកាន់តែស៊ីជម្រៅ ដើម្បីស្ថិរភាពតំបន់ឥណ្ឌូប៉ាស៊ីហ្វិក៕