ស្នងការជាន់ខ្ពស់របស់ប្រទេសឥណ្ឌា ប្រចាំប្រទេសកាណាដា បានបដិសេធថាខ្លួនមិនជាប់ពាក់ព័ន្ធអ្វីឡើយក្នុងការធ្វើឃាតមេដឹកនាំសាសនាស៊ីក (Sikh) សញ្ជាតិកាណាដាដែលត្រូវបានសម្លាប់នៅក្នុងខេត្ត ប្រ៊ីធធីស កូឡុំប៊ី (British Columbia) កាលពីឆ្នាំមុន បើទោះបីជារដ្ឋាភិបាលកាណាដា បានដាក់ឈ្មោះរូបលោកថាជាអ្នកពាក់ព័ន្ធក្នុងការធ្វើឃាតនោះក៏ដោយ។

លោក សានចាយ គូម៉ា វើម៉ា (Sanjay Kumar Verma) ដែលត្រូវបានបណ្តេញចេញកាលពីថ្ងៃចន្ទសប្តាហ៍មុនរួមជាមួយអ្នកការទូតឥណ្ឌាប្រាំនាក់ផ្សេងទៀត បាននិយាយក្នុងបទសម្ភាសន៍មួយកាលពីថ្ងៃអាទិត្យ (២០ តុលា) ថា ការចោទប្រកាន់នេះមានហេតុផលនយោបាយ។

នៅពេលត្រូវសាកសួរពីតួនាទីក្នុងការបាញ់សម្លាប់លោក ហាឌីប ស៊ីញ នីចា (Hardeep Singh Nijjar) នៅកាណាដាកាលពីថ្ងៃទី១៨ ខែមិថុនា ឆ្នាំ២០២៣ លោក Verma បានឆ្លើយថា “យើងមិនជាប់ពាក់ព័ន្ធឡើយ។ មិនមានភស្តុតាងបញ្ជាក់រឿងនោះទេ ហើយមានហេតុផលនយោបាយនៅពីក្រោយ»។ ជនជាតិឥណ្ឌា ៤នាក់ដែលរស់នៅកាណាដា ត្រូវបានចោទប្រកាន់ពីបទឃាតកម្មលើលោក Nijjar ហើយកំពុងរង់ចាំការកាត់ទោស។

នាយករដ្ឋមន្ត្រីកាណាដា លោក Justin Trudeau បានបើកបង្ហាញជាសាធារណៈនៅសប្តាហ៍មុនជាមួយនឹងការចោទប្រកាន់ដែលថា អ្នកការទូតឥណ្ឌាកំពុងកំណត់គោលដៅលើអ្នកផ្ដាច់ខ្លួនសាសនាស៊ីក នៅកាណាដា ដោយការចែករំលែកព័ត៌មានរបស់អ្នកទាំងនោះជាមួយរដ្ឋាភិបាលឥណ្ឌា។ លោក Verma បដិសេធថា រដ្ឋាភិបាលទីក្រុងញូវដេលី មិនបានកំណត់គោលដៅលើក្រុមផ្តាច់ខ្លួនសាសនាស៊ីក នៅកាណាដាឡើយ៕