ប្រទេសអូស្ត្រាលី បានប្រកាសនៅថ្ងៃអង្គារ ទី២២ ខែតុលានេះ នូវកិច្ចព្រមព្រៀងតម្លៃ ៤,៧ ពាន់លានដុល្លារអាមេរិក ដើម្បីបំពាក់អាវុធដល់កងទ័ពជើងទឹករបស់ខ្លួនជាមួយនឹងមីស៊ីលរយៈចម្ងាយមធ្យម និងរយៈចម្ងាយឆ្ងាយទំនើបរបស់សហរដ្ឋអាមេរិក ក្នុងពេលដែលមានភាពតានតឹងផ្នែកយោធាកើនឡើងឆាប់រហ័សនៅក្នុងតំបន់អាស៊ីប៉ាស៊ីហ្វិក។

កិច្ចព្រមព្រៀង ដែលត្រូវបានសាទរដោយទីក្រុងកង់បេរ៉ាថាជា «ព្រឹត្តិការណ៍ដ៏សំខាន់មួយ» ដើម្បីពង្រឹងការការពារដែនទឹករបស់ប្រទេសអូស្ត្រាលីឡើងវិញ ស្របតាមយុទ្ធសាស្ត្រថ្មីដែលត្រូវបានដាក់ចេញនៅឆ្នាំនេះ ដើម្បីទប់ទល់ «តាកទិកដ៏ខ្លាំងក្លា» របស់ប្រទេសចិន នៅក្នុងតំបន់នេះ។

ប្រទេសអូស្ត្រាលី និយាយថា ខ្លួននឹងចំណាយប្រាក់៧ពាន់លានដុល្លារអូស្ត្រាលី ឬ៤,៧ពាន់លានដុល្លារអាមេរិក ដើម្បីទិញមីស៊ីល SM-6 បំពាក់លើនាវាដែលអាចវាយប្រហារអាកាសយានប្រយុទ្ធ និងមីស៊ីលតម្រង់គោលដៅ ព្រមទាំងមីស៊ីល SM-2 Block III C រយៈចម្ងាយមធ្យម ដែលជំរុញប្រព័ន្ធបង្ហាញផ្លូវថ្មី និងសមត្ថភាពប្រយុទ្ធការពារប្រទេស។

រដ្ឋមន្ត្រីក្រសួងឧស្សាហកម្មការពារជាតិអូស្ត្រាលី លោក Pat Conroy ដែលកំពុងធ្វើទស្សនកិច្ចនៅទីក្រុងវ៉ាស៊ីនតោន បាននិយាយថា អូស្ត្រាលីប្រឈមមុខទៅនឹងបរិយាកាសយុទ្ធសាស្ត្រភូមិសាស្ត្រដ៏ស្មុគស្មាញបំផុត ចាប់តាំងពីសង្គ្រាមលោកលើកទីពីរ។

លោកនិយាយថា មីស៊ីល «ឈានមុខគេរបស់ពិភពលោក» នឹងធ្វើឲ្យប្រជាជនអូស្ត្រាលី មានសុវត្ថិភាព ទប់ទល់សត្រូវ និងការពារផលប្រយោជន៍ជាតិរបស់ប្រទេសអូស្ត្រាលី ក្នុងយុគសម័យមីស៊ីល ។