ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និង​សំណង់ បានជំរុញមន្ត្រីជំនាញ និងអាជ្ញាធរខេត្តកែប ខិតខំរួមសហការគ្នា ក្នុងការ​ពង្រីក​នូវ​គោល​ដៅ​ទេសចរណ៍ ដែលមានភាពទាក់ទាញ សម្រាប់ខេត្តកែប ដើម្បីស្រូបភ្ញៀវទេសចរ ឲ្យ​បាន​កាន់​តែ​ច្រើន​ទៅលេងកម្សាន្ត ។

ក្នុងកិច្ចប្រជុំបូកសរុបលទ្ធផលការងាររយៈពេល ៩ខែ ឆ្នាំ២០២៤ និងលើកទិស​ដៅ​អនុវត្ត​បន្ត​នៃក្រុ​មការងាររាជរដ្ឋាភិបាល ចុះមូលដ្ឋានខេត្តកែប កាលពីថ្ងៃទី២១ ខែតុលា ឆ្នាំ២០២៤ ឯកឧត្តម​ឧបនាយករដ្ឋមន្ត្រី មានប្រសាសន៍ថា ការជួបជុំគ្នានាពេលនេះ ដើម្បីរួម​កម្លាំង​គ្នា​ពូន​ជ្រុំ​ការ​វិនិយោគសាធារណៈ លើខឿនសេដ្ឋកិច្ចក្នុងខេត្តកែប ឱ្យបានប្រសើរឡើង ហើយការ​វិនិយោគ​សាធារណៈ​នេះ ជាការអភិវឌ្ឍន៍ហេដ្ឋារចនាសម្ព័ន្ធដើម្បីកំណើន ធ្វើយ៉ាងណាឱ្យប្រជាពលរដ្ឋ​ក្នុង​ខេត្ត​កែប ទទួលបានផលប្រយោជន៍ និងប្រាក់ចំណូលពីការអភិវឌ្ឍន៍នេះ ។

ឯកឧត្តមបានបន្តថា កែបជាខេត្ត ដែលមានសក្តានុពលទេសចរណ៍ ជាគោលដៅលំហែកំសាន្ត សម្រាប់​ភ្ញៀវទេសចរជាតិ និងអន្តរជាតិ ដូនចនេះក្រុមការងារចុះជួយមូលដ្ឋានខេត្ត និងអាជ្ញាធ​រ​ខេត្ត​ត្រូវ​មានការឯកភាពរួមគ្នា ដើម្បីពង្រីកទីផ្សារទាក់ទាញទេសចរ ឱ្យបាន​ទូលំ​ទូលាយ​បន្ថែម​ទៀត ដើម្បីឆ្លើយតបតម្រូវការរបស់ភ្ញៀវទេសចរណ៍ ក្នុងនោះត្រូវរៀបចំឆ្នេរ២៨០០ ដែល​ជា​ផលិត​ផល​ទេសចរណ៍ថ្មី១ សម្រាប់ទាក់ទាញភ្ញៀវទេសចរ ជាឆ្នេរគំរូមួយសម្រាប់ខេត្តកែប ហើយ​ទន្ទឹម​នេះ ត្រូវរៀបចំផ្លូវជិះកង់លំហែ នៅតាមឆ្នេរសមុទ្រ សម្រាប់ភ្ញៀវទេសចរ ក៏ដូច​ជា​ប្រជា​ពលរដ្ឋ​បាន​ជិះកង់លំហែ ដើម្បីសុខភាពផងដែរ ។

ឯកឧត្តម សាយ សំអាល់ បានបន្ថែមថា ដោយសារខេត្តកែបជាទីក្រុងទេសចរណ៍ គឺត្រូវផ្តោត​សម្រេច​ឲ្យ​បាននូវចក្ខុវិស័យ យុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល ក្នុង​ការ​ផ្គត់​ផ្គង់ទឹក ភ្លើង ផ្លូវ ដោយឡែកធនធានមនុស្ស និងបច្ចេកវិទ្យា ត្រូវផ្ដើម​ចេញ​ពី​សេវា​ពេញ​លេញ ​ផ្នែកទូរគមនាគមន៍ ៕ អត្ថបទ បាន សុខរិទ្ធិ