អាជ្ញាធរការពារជាតិកោះតៃវ៉ាន់ បាននិយាយនៅថ្ងៃអង្គារ (២២ តុលា) នេះថា សមយុទ្ធបាញ់គ្រាប់ពិតរបស់ប្រទេសចិន នៅក្នុងខេត្តទល់មុខនឹងកោះនេះ គឺជាផ្នែកមួយនៃសមយុទ្ធប្រចាំឆ្នាំជាប្រចាំ ប៉ុន្តែក៏អាចជាផ្នែកមួយនៃការបង្កើន "ឥទ្ធិពលរារាំង" របស់ខ្លួននៅក្នុងដែនទឹកនៃច្រកសមុទ្រតៃវ៉ាន់ផងដែរ។

រដ្ឋបាលសុវត្ថិភាពដែនសមុទ្ររបស់ចិន បាននិយាយថា តំបន់ជុំវិញកោះ នីវសាន (Niushan) ក្នុងប្រជុំកោះ ភីងថាន (Pingtan) ខេត្ត ហ្វ៊ូជាន (Fujian) នឹងត្រូវបិទរយៈពេល ៤ម៉ោងនៅថ្ងៃអង្គារសម្រាប់ការធ្វើសមយុទ្ធបាញ់គ្រាប់ពិត។ កោះ Niushan នេះក៏ស្ថិតនៅភាគខាងត្បូងនៃប្រជុំកោះ ម៉ាត់ស៊ូ (Matsu) ដែលតៃវ៉ាន់គ្រប់គ្រង។

អាជ្ញាធរការពារជាតិតៃវ៉ាន់ បាននិយាយនៅក្នុងសេចក្តីថ្លែងការណ៍មួយថា សមយុទ្ធទាំងនោះគឺជាផ្នែកមួយនៃការហ្វឹកហ្វឺនរបស់ចិនជាប្រចាំ ហើយខ្លួនកំពុងតាមដានយ៉ាងយកចិត្តទុកដាក់។ ទោះជាយ៉ាងនេះក៏ដោយ អាជ្ញាធរនិយាយថា ខ្លួនមិនអាចច្រានចោលបានទេ ដែលថាកាហ្វឹកហ្វឺននោះក៏ជាផ្នែកនៃ "ការពង្រីកឥទ្ធិពលរារាំងរបស់ខ្លួន រួមជាមួយនឹងសក្ដានុពលនៅច្រកសមុទ្រតៃវ៉ាន់" ប៉ុន្តែមិនបានបញ្ជាក់លម្អិតឡើយ។

ប្រទេសចិនកាលពីសប្តាហ៍មុន បានធ្វើហ្គេមសង្រ្គាមមួយថ្ងៃជុំវិញកោះដែលទីក្រុងប៉េកាំង ចាត់ទុកថាជាទឹកដីរបស់ខ្លួន ជាការព្រមានដល់ "អំពើផ្តាច់ខ្លួន"។ កោះតៃវ៉ាន់ មានក្ដីបារម្ភ និងបន្តត្អូញត្អែរចំពោះបេសកកម្មយន្តហោះចម្បាំង និងនាវាចម្បាំងរបស់ចិនជាប្រចាំនៅក្នុងដែនអាកាស និងដែនទឹកជុំវិញកោះនេះ៕