អាជ្ញាធររដ្ឋ វ៉ាស៊ីនតោន (Washington) របស់សហរដ្ឋអាមេរិក បាននិយាយនៅថ្ងៃចន្ទ (២១ តុលា) ថា មនុស្ស ៥នាក់ត្រូវបានសម្លាប់នៅក្នុងការបាញ់ប្រហារនៅលំនៅឋានមួយជិតទីក្រុង ស៊ីអាថល (Seattle) ហើយក្មេងប្រុសវ័យ ១៥ឆ្នាំម្នាក់ ត្រូវបានចាប់ខ្លួនចំពោះការសម្លាប់នេះ។

នាយកដ្ឋានតម្រួតតំបន់ ឃីង ខោនធី (King County) បាននិយាយនៅក្នុងសេចក្តីថ្លែងការណ៍មួយថា កុមារ ៣នាក់ និងមនុស្សពេញវ័យ ២នាក់ត្រូវបានសម្លាប់ ចំណែកក្មេងស្រីម្នាក់ដែលរស់នៅក្នុងលំនៅឋានកើតហេតុនោះបានរងរបួស។ អ្នកនាំពាក្យនាយកដ្ឋានតម្រួតលោក ម៉ៃ មេលីស (Mike Mellis) បានប្រាប់អ្នកសារព័ត៌មាននៅកន្លែងកើតហេតុថា ជនសង្ស័យត្រូវបានក្រុមមន្រ្តីចាប់ខ្លួន ដោយពុំមានការប៉ះទង្គិចឡើយ។

ភ្លាមៗនេះគេមិនទាន់ដឹងច្បាស់ទេថា អ្នកពាក់ព័ន្ធទាំងអស់គឺជាសមាជិកគ្រួសារតែមួយ ឬយ៉ាងណា ហើយនាយកដ្ឋានតម្រួតបាននិយាយថា មូលហេតុនៃអំពើហិង្សានេះកំពុងស្ថិតក្រោមការស៊ើបអង្កេត។

អាជ្ញាធរនិយាយថា ក្រុមមន្រ្តីបានឆ្លើយតបទៅនឹងការហៅទូរស័ព្ទជាច្រើនដងពីការបាញ់កាំភ្លើងនៅលំនៅឋានមួយក្នុងតំបន់ ហ្វល ស៊ីធី (Fall City) ប្រហែល ១៦គីឡូម៉ែតភាគខាងកើតនៃទីក្រុង Seattle នៅព្រឹកថ្ងៃចន្ទ ដោយបន្ថែមថា ក្មេងប្រុសដែលត្រូវបានចាប់ខ្លួននោះកំពុងនៅក្នុងមន្ទីរឃុំឃាំងអនីតិជន King County ហើយអាចនឹងត្រូវបង្ហាញខ្លួននៅតុលាការជាលើកដំបូងនៅថ្ងៃអង្គារ ឬថ្ងៃពុធសប្ដាហ៍នេះ៕