ប្រធានាធិបតីអ៊ុយក្រែនលោក វ្ល៉ូឌីមី ហ្សេឡិនស្គី ( Volodymyr Zelensky) និង រដ្ឋមន្ត្រីការពារជាតិអាមេរិកដែលកំពុងបំពេញទស្សនកិច្ច លោក Lloyd Austin បានពិភាក្សាអំពីបញ្ហាការពារជាតិ ក្នុងអំឡុងពេលកិច្ចប្រជុំរបស់ពួកគេ កាលពីថ្ងៃចន្ទ។ នេះបើយោងតាមសេវាសារព័ត៌មានរបស់ការិយាល័យប្រធានាធិបតី។

កិច្ចពិភាក្សានេះ បានផ្តោតទៅលើសំណើរបស់អ៊ុយក្រែនសុំប្រើប្រាស់អាវុធរយៈចម្ងាយឆ្ងាយ ដើម្បីវាយប្រហារគោលដៅយោធា នៅក្នុងប្រទេសរុស្ស៊ី។

លោក ហ្សេឡិនស្គី និងលោក Austin ក៏បាននិយាយផងដែរអំពីការបង្កើនការផលិតយានដ្រូនវាយប្រហារ មីស៊ីលតម្រង់គោលដៅ គ្រាប់កាំភ្លើងធំ និងប្រព័ន្ធការពារអាកាស។

លោក Austin បានប្រកាសកញ្ចប់ជំនួយយោធាថ្មីរបស់សហរដ្ឋអាមេរិកសម្រាប់អ៊ុយក្រែនដែលមានតម្លៃ ៤០០លានដុល្លារអាមេរិក ដែលរួមមានគ្រាប់រំសេវ គ្រឿងយុទ្ធោបករណ៍ និងអាវុធ។

ចាប់តាំងពីខែកុម្ភៈឆ្នាំ ២០២២ សហរដ្ឋអាមេរិក បានផ្តល់ជំនួយយោធាចំនួន ៦៤,១ ពាន់លានដុល្លារដល់អ៊ុយក្រែន។ នេះបើយោងតាមឯកសារដែលចេញផ្សាយដោយក្រសួងការបរទេសសហរដ្ឋអាមេរិក នៅក្នុងខែតុលា ឆ្នាំនេះ។