រដ្ឋអាជ្ញាបាននិយាយកាលពីថ្ងៃចន្ទថា ពលរដ្ឋអ៊ីស្រាអែលចំនួន ៧នាក់ ត្រូវបានចាប់ខ្លួនកាលពីខែមុនពីបទសង្ស័យថា បានធ្វើចារកម្មសម្រាប់ប្រទេសអ៊ីរ៉ង់រយៈពេល ២ឆ្នាំ ដោយបំពេញការងាររាប់រយតាមការបញ្ជារបស់សាធារណរដ្ឋឥស្លាមនេះ។

លោកអគ្គស្នងការនរគបាល Yaron Binyamin ដែលជាប្រធានអង្គភាពព្រហ្មទណ្ឌកម្រិតធ្ងន់ Lahav 433 នៃនគរបាលអ៊ីស្រាអែល បាននិយាយថា៖«នេះគឺជាករណីធ្ងន់ធ្ងរបំផុតមួយ ដែលយើងធ្លាប់បានស៊ើប អង្កេត។ មានលទ្ធភាពពិតប្រាកដមួយដែលការចោទប្រកាន់ចម្បង គឺការជួយដល់សត្រូវ ក្នុងសម័យសង្រ្គាម ដែលការផ្តន្ទាទោស គឺការប្រហារជីវិត ឬដាក់ពន្ធនាគារអស់មួយជីវិត។

ជនសង្ស័យទាំងនោះ ដែលជាអ្នកស្រុកទាំងអស់នៃទីក្រុង Haifa និងភាគខាងជើង ដែលបានចាកចេញពីប្រទេសអាស៊ែរបៃហ្សង់ រួមមានទាហានម្នាក់ដែលបានបោះបង់ចោលយោធា ក៏ដូចជាអនីតិជនពីរនាក់ដែលមានអាយុពី ១៦-១៧ឆ្នាំ។ អាជ្ញាធរ បាននិយាយថា ពួកគេ បានបំពេញបេសកកម្មប្រហែល ៦០០ ក្នុងរយៈពេលពីរឆ្នាំ។

ជនសង្ស័យពេញវ័យ មានឈ្មោះ Azis Nisanov, Alexander Sadykov, Vyacheslav Gushchin, Yevgeny Yoffe និង Yigal Nissan ចំណែកអនីតិជន មិនត្រូវបានបញ្ចេញឈ្មោះនោះទេ។