យោធាអ៊ីស្រាអែល នៅថ្ងៃអង្គារ (ទី២២ ខែតុលា) នេះ បាននិយាយថា យន្តហោះរបស់អ៊ីស្រាអែលបានវាយប្រហារគោលដៅរបស់ក្រុមហេសបូឡា នៅជិតមន្ទីរពេទ្យសាកលវិទ្យាល័យ Rafik Hariri ក្នុងទីក្រុងបេរូត កាលពីល្ងាចថ្ងៃចន្ទ (ទី២១ ខែតុលា) ប៉ុន្តែមិនបានកំណត់គោលដៅលើមន្ទីរពេទ្យនោះទេ ហើយមន្ទីរពេទ្យនេះមិនបានរងប៉ះពាល់ដោយការវាយប្រហារនេះឡើយ។

អំឡុងសន្និសីទសារព័ត៌មាន នៅថ្ងៃអង្គារនេះ ប្រធានមន្ទីរពេទ្យ លោក Jihad Saadeh បាននិយាយថា កន្លែងព្យាបាលដ៏សំខាន់របស់រដ្ឋាភិបាលក្រុងបេរូត បានរងការខូចខាតដោយសារការវាយប្រហាររបស់អ៊ីស្រាអែល នៅក្បែរនោះ។

លោក Saadeh បាននិយាយថា៖ «យើងទទួលរងការវាយប្រហារ កាលពីម្សិលមិញ។ មិនថា វាត្រូវបានកំណត់គោលដៅ ឬអត់ យើងមិនដឹងឡើយ ប៉ុន្តែអ៊ីស្រាអែលមិនបានកំណតើព្រំដែនវាយប្រហារច្បាស់លាស់ទេ»។ លោកបានបន្ថែមថា កម្ទេចកម្ទីដែលទំនងជាគ្រាប់រំសេវធុនធ្ងន់ បានបំផ្លាញបន្ទះស្រូបថាមពលពន្លឺព្រះអាទិត្យ និងផ្នែកខាងមុខរបស់មន្ទីរពេទ្យ ហើយបានធ្វើកញ្ចក់បង្អួចបែក។

ទោះបីជាមិនមានអ្នករងរបួស ក្នុងចំណោមបុគ្គលិកក៏ដោយ ក៏ការខិតខំប្រឹងប្រែងជួយសង្គ្រោះមនុស្ស នៅមុខមន្ទីរពេទ្យ កំពុងបន្តធ្វើ។

គួរបញ្ជាក់ថា Dahiyeh គឺជាស្រុកមួយនៅតំបន់ជាយក្រុងភាគខាងត្បូងគ្រប់គ្រងដោយក្រុមហសេបូឡារបស់ទីក្រុងបេរូត ដែលតែងត្រូវបានវាយប្រហារម្តងហើយម្តងទៀត នៅក្នុងការវាយប្រហារតាមអាកាសរបស់អ៊ីស្រាអែល ប្រឆាំងនឹងកងជីវពលដ៏មានឥទ្ធិពលដែលគាំទ្រដោយអ៊ីរ៉ង់៕