លោកប្រធានាធិបតីចិន Xi Jinping បាននិយាយកាលពីថ្ងៃអង្គារសប្ដាហ៍នេះថាប្រទេសចិន និងរុស្ស៊ីបានរកឃើញផ្លូវត្រឹមត្រូវសម្រាប់ប្រទេសធំៗជិតខាងក្នុងការចុះសម្រុងជាមួយគ្នា ដែលមានលក្ខណៈមិនមែនជាសម្ពន្ធភាព មិនប្រឈមដាក់គ្នា និងមិនកំណត់គោលដៅភាគីទីបីណាមួយឡើយ។

លោក Xi បានធ្វើសេចក្ដីអាត្ថាធិប្បាយបែបនេះ ក្នុងជំនួបជាមួយលោកប្រធានាធិបតីរុស្ស៊ី Vladimir Putin នៅទីក្រុង កាហ្សាន (Kazan)របស់រុស្ស៊ី ក្រោយលោកបានទៅដល់ទឹកដីរុស្ស៊ី សម្រាប់កិច្ចប្រជុំកំពូល BRICS លើកទី១៦។ មេដឹកនាំទាំង២ក៏បានពិភាក្សាពីសង្រ្គាមអ៊ុយក្រែនផងដែរ។

ដោយកត់សម្គាល់ថាឆ្នាំនេះជាខួបលើកទី ៧៥ នៃការបង្កើតទំនាក់ទំនងការទូតរវាងចិន និងរុស្ស៊ី លោក Xi បាននិយាយថា ក្នុងរយៈពេលប៉ុន្មានឆ្នាំកន្លងមក ទំនាក់ទំនងរវាងប្រទេសទាំងពីរបានជួបព្យុះភ្លៀងច្រើនណាស់។

លោក Xi បាននិយាយថា ភាគីទាំងពីរដោយប្រកាន់ខ្ជាប់នូវស្មារតីនៃភាពជាអ្នកជិតខាងល្អ និងមិត្តភាពយូរអង្វែង ការសម្របសម្រួលយុទ្ធសាស្ត្រគ្រប់ជ្រុងជ្រោយ និងផ្តល់ផលប្រយោជន៍ទៅវិញទៅមក ព្រមទាំងកិច្ចសហប្រតិបត្តិការឈ្នះ-ឈ្នះ បានបន្តធ្វើឱ្យកាន់តែស៊ីជម្រៅ និងពង្រីកការសម្របសម្រួលយុទ្ធសាស្ត្រគ្រប់ជ្រុងជ្រោយ និងកិច្ចសហប្រតិបត្តិការជាក់ស្តែងលើវិស័យផ្សេងៗ។

លោកប្រធានាធិបតីចិន បានថ្លែងថា ប្រការនេះបានរុញឲ្យមានសន្ទុះដ៏ខ្លាំងក្លាក្នុងការអភិវឌ្ឍន៍ការរស់ឡើងវិញ និងទំនើបកម្មនៃប្រទេសទាំងពីរ ហើយបានរួមចំណែកយ៉ាងសំខាន់ក្នុងការលើកកម្ពស់សុខុមាលភាពរបស់ប្រជាជនចិន និងរុស្ស៊ី និងការលើកកម្ពស់ភាពត្រឹមត្រូវ ក៏ដូចជាយុត្តិធម៌អន្តរជាតិ៕