ក្រសួងការពារជាតិម៉ិកស៊ិក បាននិយាយកាលពីថ្ងៃអង្គារ (២២ តុលា) ថា ការបាញ់ប្រហារនៅជិតរដ្ឋធានីនៃរដ្ឋ ស៊ីណាឡូអា (Sinaloa) ដ៏ហិង្សារបស់ប្រទេសម៉ិកស៊ិក បានសម្លាប់សមាជិកក្រុមជន្ធពាលចំនួន ១៩នាក់ ដោយមេក្រុមជួញដូរគ្រឿងញៀនក្នុងស្រុកម្នាក់ត្រូវបានចាប់ខ្លួន ខណៈអំពើហិង្សាក្នុងក្រុមឧក្រិដ្ឋកម្មកាន់តែខ្លាំងក្លាឡើង។

យោងតាមសេចក្តីថ្លែងការណ៍របស់ក្រសួងបានឱ្យដឹងថា ជម្លោះដ៏បង្ហូរឈាមកាលពីថ្ងៃចន្ទនោះបានកើតឡើងប្រហែល ១១គីឡូម៉ែត្រប៉ុណ្ណោះ នៅខាងក្រៅរដ្ឋធានី ឃូលីអាកាន (Culiacan) នៃរដ្ឋ Sinaloa នៅពេលដែលខ្មាន់កាំភ្លើងជាង ៣០នាក់ បានបាញ់រះទៅលើទាហាន។

ក្រសួងបន្ថែមថា ខ្មាន់កាំភ្លើងសង្ស័យមួយចំនួនបានរត់គេចខ្លួនពីកន្លែងកើតហេតុបន្ទាប់ពីភ្នាក់ងារសហព័ន្ធបានបាញ់តបវិញ ហើយរថយន្ត ៧គ្រឿង និងអាវុធជិត ៣០ដើម រួមទាំងកាំភ្លើងយន្ត គ្រាប់រំសេវ និងអាវកាក់ទាហាន រួមទាំងមួកសុវត្ថិភាព ត្រូវបានរឹបអូស។

អំពើហិង្សាដ៏ឃោរឃៅដែលកំពុងញាំញីរដ្ឋម៉ិកស៊ិកមួយនេះត្រូវបានអ្នកវិភាគសន្តិសុខមើលឃើញថា ទំនងជាធ្វើឱ្យក្រុមជួញដូរគ្រឿងញៀនដ៏ធំទាំងពីរគឺក្រុម ឡូស ឆាពីតូស (Los Chapitos) និងក្រុម ស៊ីណាឡូអា (Sinaloa) ប្រយុទ្ធគ្នាទៅវិញទៅមក ហើយកាន់តែខ្លាំងឡើងចាប់តាំងពីដើមខែកញ្ញា ដោយទិន្នន័យផ្លូវការបង្ហាញថា មានមនុស្សស្លាប់ប្រហែល ២០០នាក់ និងជាង ៣០០នាក់ផ្សេងទៀតត្រូវបានគេជឿថាកំពុងបាត់ខ្លួន៕