​បាល់ទាត់៖ ​ក្រុម​សាំមូរ៉ៃជប៉ុន​រកបាន​គ្រាប់​ជ័យជំនះ​ចុង​ម៉ោងធ្វើឱ្យ​អូស្ត្រាលី​ស្គាល់​បរាជ័យ​លើកដំបូង​ក្នុង​ពូ​ល B នៃ​វគ្គ​ជំ​រុះ World Cup ២០២២ ជុំ​ទី៣ ក្រោយ​យកឈ្នះ​លទ្ធផល ២-១​។ ​​ជប៉ុន​ដែល​ចាញ់​ពីរ​ក្នុងចំណោម ៣ប្រកួត​របស់ខ្លួន​កន្ល​ង​មកត្រូវការ​ឈ្នះ​ប្រកួត​នេះ​ជា​ចាំបាច់​ដើម្បី​ឱកាស​ទៅកាន់​កាតា ហើយ​ពួកគេ​ក៏​រកបាន​គ្រាប់​នាំមុខ​មុន​នៅ​នាទី​ទី៨ ដោយ Ao Tanaka បន្ទាប់ពី​កំហុស​របស់​ខ្សែការពារ​អូស្ត្រាលី Aziz Behich ទាត់​បាល់​មិនត្រូវ មុន​ពេលដែល​អូស្ត្រាលី​ស្ទើ​តែ​តាម​ស្មើ​វិញ​ទៅហើយ​តែមួយ​ជើង​របស់ Adam Taggart បុក​នឹង​បង្គោល​ទី​។

​​យ៉ាងណាក្តី​អូស្ត្រាលី​ដែល​ឈ្នះ​ទាំង ៣​ប្រកួត​កន្លងមក​ក៏​តាម​ស្មើ​វិញ​បានសំរេច​នៅ​នាទី​ទី៦៩ ដោយ​បាល់ Freekick របស់ Ajdin Hrustic។ ​​តែ​ការប្រកួត​នៅសល់តែ ៤នាទី​ទៀត​ប៉ុណ្ណោះ​ពោលគឺ​នាទី​ទី៨៦ ទៅហើយ​កីឡាករ​បំរុង Takuma Asano ស៊ុត​ជួយ​បាន​ដោយ​អ្នកចាំទី​អូស្ត្រាលី តែ​ជា​ថ្ងៃ​ស៊យ​របស់ Aziz Behich ធ្វើឱ្យ​ចូល​ទី​ខ្លួនឯង​។ ​​ជ័យជំនះ​នេះ​ធ្វើឱ្យ​ជប៉ុន​មានសង្ឃឹម​មកវិញ​ក្នុង​វគ្គ​ជំ​រុះ​ជុំ​ទី៣ នេះហើយ​ក៏បាន​បញ្ចប់​ជ័យជំនះ ១២ប្រកួត​ជាប់​គ្នា​របស់​អូស្ត្រាលី​ផងដែរ​ក្នុង​យុទ្ធនាការ​ជំ​រុះ World Cup ២០២២ នៅ​កាតា​នេះ​។ ​​ងាក​មក​ការប្រកួត​នៅក្នុង​ពូ​ល B នេះដែរ​អារ៉ាប៊ីសាអ៊ូឌីត​បាន​បន្តដំណើរ​ប្រកួត​ឈ្នះ​ជាប់​គ្នា​ទាំង​ ៤​ប្រកួត​ក្រោយយកឈ្នះ​ចិន​យប់មិញ ៣-២​។ ​​កីឡាករ Sami Al-Najei រកបាន​ពីរ​គ្រាប់​ម្នាក់ឯ​ក្នុងការ​ប្រកួត​នេះ និង​មួយ​គ្រាប់​ទៀត​រកបាន​ដោយ Al-Buraikan ខណៈ​ពីរ​គ្រាប់​របស់​ចិន​រកបាន​ដោយ​កីឡាករ​ប្រេ​ស៊ី​ល​ចូលសញ្ជាតិ​ចិន Aloisio និង Wu Xi​។​

​​ជ័យជំនះ​នេះ​ធ្វើឱ្យ​អារ៉ាប៊ីសាអ៊ូឌីត​ឈ្នះ​បួន​ប្រកួត​ជាប់​គ្នា​មាន ១២ពិន្ទុ​ពេញ​តាម​ពីក្រោយ​ដោយ​អូស្ត្រាលី​មាន ៩ពិន្ទុ​។ ​​ចំណែក​វៀតណាម​នៅតែ​មិនអាច​រកបាន​ពិន្ទុ​ដំបូង​របស់ខ្លួន​បាន បន្ទាប់ពី​ចាញ់​អូ​ម៉​ង់ ៣-១ បើទោះជា​នាំមុខ​មុន​នៅ​នាទី​ទី៣៩ ដោយ Nguyen Tien Linh ក៏ដោយ​។ ​វៀតណាម​នៅតែ​ឈរ​ក្រោម​គេ​ដដែល​គ្មាន​ពិន្ទុ​រាប់​ ខណៈ​ចិន​មាន ៣ពិន្ទុតាម​ពីក្រោយ​ជប៉ុន និង​អូ​ម៉​ង់​មាន ៦ពិន្ទុ​ដូចគ្នា​៕

អត្ថបទ​៖​នាង សុភា​វុ​ធ