នេប៉ាល់៖ នគរបាលនិយាយថា មនុស្សយ៉ាងហោចណាស់ ២៨នាក់បានស្លាប់ និងជាច្រើននាក់ទៀតបានរងរបួសនៅក្នុងគ្រោះថ្នាក់រថយន្តក្រុងមួយនៅភាគពាយ័ព្យប្រទេសនេប៉ាល់។ ប្រព័ន្ធផ្សព្វផ្សាយក្នុងស្រុកបានរាយការណ៍ថា រថយន្តនេះបានធ្វើដំណើរឆ្លងកាត់ស្រុក Mugu នៅពេលដែលរថយន្តនេះបានធ្លាក់ផ្លូវ ហើយបានធ្លាក់ចុះពីលើភ្នំភ្លាមៗនៅពាក់កណ្តាលអធ្រាត្រថ្ងៃអង្គារ។
គេនៅមិនទាន់ដឹងច្បាស់នៅឡើយទេពីមូលហេតុដែលបណ្ដាលឲ្យរថយន្តនេះធ្លាក់ផ្លូវ ប៉ុន្តែរបាយការណ៍ខ្លះលើកឡើងថា រថយន្តក្រុងអាចមានបញ្ហាដោយសារហ្វ្រាំងមិនស៊ី។ បើនិយាយពីគ្រោះថ្នាក់ចរាចរណ៍មិនមែនជារឿងចម្លែកទេនៅក្នុងប្រទេសនេប៉ាល់ ហើយជាធម្មតាបណ្តាលមកពីផ្លូវថ្នល់មិនល្អ ឬការថែទាំគុណភាពយានយន្តមិនបានល្អ។ រូបភាពដែលត្រូវបានផ្សព្វផ្សាយដោយប្រព័ន្ធផ្សព្វផ្សាយក្នុងតំបន់ បានបង្ហាញពីបុគ្គលិកជួយសង្គ្រោះកំពុងដឹកជញ្ជូនមនុស្ស និងអ្វីដែលទំនងជារបស់ផ្ទាល់ខ្លួនដូចជាកាបូបធ្វើដំណើរជាដើម។ នគរបាលបាននិយាយថា ការស៊ើបអង្កេតកំពុងប្រព្រឹត្តិទៅហើយ។
ពួកគេបានបន្ថែមថា មនុស្សជាច្រើននៅលើរថយន្តក្រុងប្រហែលជាបានធ្វើដំណើរទៅផ្ទះវិញ បន្ទាប់ពីបានចូលរួមប្រារព្ធពិធីបុណ្យ Dashain ដែលជាពិធីបុណ្យសាសនាដ៏សំខាន់មួយនៅក្នុងប្រទេសនេប៉ាល់ និងឥណ្ឌា។ មនុស្សជាង ១០នាក់កំពុងត្រូវបានព្យាបាលរបួស ដោយអ្នកខ្លះត្រូវបានបញ្ជូនទៅមន្ទីរពេទ្យក្បែរនោះតាមយន្តហោះ។ យ៉ាងណាក៏ដោយគេក៏នៅទាន់ដឹងមិនច្បាស់ទេថា តើមានមនុស្សប៉ុន្មាននាក់ធ្វើដំណើរតាមរថយន្តក្រុងនោះនៅពេលរេចង្កូតធ្លាក់ចេញពីផ្លូវ ប៉ុន្តែនគរបាលបាននិយាយថា ចំនួនអ្នកស្លាប់អាចកើនឡើងបន្ថែមទៀត៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
