ប្រព័ន្ធផ្សព្វផ្សាយរដ្ឋរបស់ប្រទេសលីបង់ បានរាយការណ៍ថា ការវាយឆ្មក់របស់អ៊ីស្រាអែលចំនួន១៧ លើក នៅជាយក្រុងភាគខាងត្បូងទីក្រុងបេរូត បានបំផ្លាញអគារចំនួន៦កន្លែង ហើយការិយាល័យប្រព័ន្ធផ្សព្វផ្សាយគាំទ្រអ៊ីរ៉ង់ដែលទុកចោល ក៏បានរងការវាយប្រហារផងដែរ កាលពីថ្ងៃពុធ។

វីដេអូរបស់ទូរទស្សន៍ AFPTV បានបង្ហាញពីការផ្ទុះដ៏ធំមួយដែលក្រោយមកមានការផ្ទុះទ្រង់ទ្រាយតូចៗជាច្រើន នៅតំបន់ជាយក្រុងភាគខាងត្បូងដែលប្រយុទ្ធគ្នា បន្ទាប់ពីកងទ័ពអ៊ីស្រាអែល បានចេញការព្រមានជម្លៀសប្រជាជនសម្រាប់តំបន់នោះ ជាកន្លែងដែលក្រុមហេសបូឡា កំពុងគ្រប់គ្រង។

ទីភ្នាក់ងារសារព័ត៌មានជាតិផ្លូវការ (NNA) បានរាយការណ៍ថា យ៉ាងហោចណាស់មានការវាយឆ្មក់របស់អ៊ីស្រាអែលចំនួន១៧លើក ដែលនេះបានបង្ហាញពីអំពើហិង្សាបំផុតមួយនៅពេលយប់ នៅក្នុងតំបន់នេះ ចាប់តាំងពីសង្គ្រាមអ៊ីស្រាអែលនិងក្រុមហេសបូឡា បានផ្ទុះឡើងកាលពីថ្ងៃទី២៣ ខែកញ្ញា។

ទីភ្នាក់ងារសារព័ត៌មាន NNA បាននិយាយថា អគារចំនួន៦កន្លែង ត្រូវបានបំផ្លាញនៅជុំវិញជាយក្រុង Laylaki ដោយបានចាត់ទុកការវាយឆ្មក់នេះ ថាជា «អំពើហិង្សាបំផុត នៅក្នុងតំបន់ចាប់តាំងពីការចាប់ផ្តើមសង្រ្គាម»។

ការវាយប្រហារ បានកើតឡើងភ្លាមៗបន្ទាប់ពីអ្នកនាំពាក្យភាសាអារ៉ាប់របស់យោធាអ៊ីស្រាអែល លោក Avichay Adraee បានចេញការព្រមានអំពីការជម្លៀសប្រជាជន នៅលើវេទិកាបណ្តាញផ្សព្វផ្សាយសង្គម X ។

ទូរទស្សន៍គាំទ្រអ៊ីរ៉ង់ Al-Mayadeen កាលពីថ្ងៃពុធ បានរាយការណ៍ថា ការវាយប្រហាររបស់អ៊ីស្រាអែល បានដាក់គោលដៅទៅលើការិយាល័យ ដែលខ្លួនបានទុកចោលនៅទីនោះ ហើយ ខ្លួននឹងឲ្យកងទ័ពអ៊ីស្រាអែល «ទទួលខុសត្រូវ»។