ទឹកជំនន់ និងបំណាក់ដី ដែលកើតឡើងមកពីព្យុះត្រូពិក ត្រាមី (Trami) វាយប្រហារតំបន់ឦសាននៃកោះ លូហ្សូន (Luzon) ដ៏សំខាន់របស់ហ្វីលីពីន នៅព្រឹកថ្ងៃព្រហស្បតិ៍ (២៤ តុលា) នេះ បានបង្ខំឱ្យសាលារៀន និងការិយាល័យរដ្ឋាភិបាលត្រូវបិទរយៈពេលពីរថ្ងៃជាប់គ្នា ខណៈអ្នកស្លាប់កើនឡើងដល់ ២៤នាក់។

ទីភ្នាក់ងារអាកាសធាតុរដ្ឋ បាននិយាយនៅក្នុងព្រឹត្តិបត្រអាកាសធាតុម៉ោង ៨ព្រឹក (ម៉ោងក្នុងស្រុក) ថា ព្យុះ Trami ដែលមានល្បឿនខ្យល់បក់អតិបរមា ៩៥គីឡូម៉ែត្រក្នុងមួយម៉ោង និងខ្យល់កន្រ្តាក់រហូតដល់ ១៦០គីឡូម៉ែត្រក្នុងមួយម៉ោង កំពុងធ្វើដំណើរឆ្ពោះទៅទិសខាងលិចឆ្លងកាត់ខេត្ត អ៊ីសាបេឡា (Isabela) ឆ្ពោះទៅសមុទ្រចិនខាងត្បូង។

ទីភ្នាក់ងារអាកាសធាតុបានព្រមានពីភ្លៀងធ្លាក់យ៉ាងខ្លាំង ទឹកជំនន់ បំណាក់ដី និងរលកសមុទ្រធំៗសម្រាប់ខេត្តភាគខាងជើងមួយចំនួន។ មន្ត្រីខេត្តបាននិយាយថា យ៉ាងហោចណាស់មនុស្ស ២៤នាក់ បានស្លាប់ ដែលភាគច្រើនដោយសារតែការលង់ទឹកនៅក្នុងតំបន់ ប៊ីខូល (Bicol) ដែលរងគ្រោះខ្លាំង និងខេត្ត កេហ្សូន (Quezon) ក្បែរនោះ ខណៈចំនួនអ្នកស្លាប់ត្រូវបានគេរំពឹងថានឹងកើនឡើងបន្ថែម។

អ្នកស្រុករាប់ពាន់នាក់បានភៀសខ្លួនចេញពីផ្ទះសម្បែងរបស់ពួកគេនៅតំបន់ ប៊ីខូល ភាគកណ្តាល ខណៈទឹកជំនន់បានឡើងដល់កម្រិតខ្ពស់រហូតដល់ដំបូលផ្ទះបឹងហ្គាឡូ។ ហ្វីលីពីន ជាធម្មតាកត់ត្រាជាមធ្យមនូវព្យុះត្រូពិចចំនួន២០ ក្នុងមួយឆ្នាំ ហើយជារឿយៗបណ្តាលឱ្យមានភ្លៀងធ្លាក់ខ្លាំង ខ្យល់កន្រ្តាក់ និងបំណាក់ដី ដែលបង្កការបំផ្លិចបំផ្លាញជាច្រើន៕