ក្រុមហ៊ុនយន្តហោះខ្នាតយក្ស Boeing របស់សហរដ្ឋអាមេរិក បាននិយាយថា ក្រុមហ៊ុនបានខាតបង់ប្រាក់សរុបចំនួន ៦,១៧ពាន់លានដុល្លារក្នុងខែកក្កដា ដល់ខែកញ្ញា ហើយការធ្វើកូដកម្មដែលកំពុងបន្ត បានធ្វើឲ្យប៉ះពាល់ដល់ការខាតបង់នេះ។

ការប្រកាសកាលពីថ្ងៃពុធ បង្ហាញពីការខាតបង់លើកទីប្រាំបួនជាប់ៗគ្នារបស់ក្រុមហ៊ុន។ វាជាចំនួនខាតបង់ច្រើនបំផុត ចាប់តាំងពីត្រីមាសដែលបានបញ្ចប់ទៅក្នុងខែធ្នូ ឆ្នាំ២០២០ នៅពេលដែលតម្រូវការសម្រាប់ការដឹកជញ្ជូនតាមផ្លូវអាកាស បានធ្លាក់ចុះដោយសារតែការរាតត្បាតវីរុសកូរ៉ូណា។

កត្តាមួយផ្សេងទៀត នៅពីក្រោយការខាតបង់ចុងក្រោយនេះ គឺការពន្យាពេលក្នុងការបញ្ជូនយន្តហោះ 777X ជំនាន់ក្រោយ ដែលក្រុមហ៊ុន Boeing និយាយថា នឹងក្លាយជាយន្តហោះដែលមានម៉ាស៊ីនភ្លោះធំបំផុតរបស់ពិភពលោក។

ការធ្វើកូដកម្ម គឺជាលើកដំបូងក្នុងរយៈពេល១៦ឆ្នាំកន្លងទៅនេះសម្រាប់ក្រុមហ៊ុន Boeing ដែលបានធ្វើឲ្យប៉ះពាល់ដល់ការផលិត និងការបញ្ជូនយន្តហោះរបស់ខ្លួន។

បុគ្គលិកប្រមាណ ៣៣.០០០ នាក់ បានធ្វើកូដកម្ម កាលពីថ្ងៃទី ១៣ ខែកញ្ញា បន្ទាប់ពីការចរចាលើប្រាក់ឈ្នួល និងបញ្ហាផ្សេងៗទៀត បានជាប់គាំង។

បុគ្គលិក បានបោះឆ្នោត កាលពីថ្ងៃពុធ លើសំណើកិច្ចសន្យាថ្មីពីក្រុមហ៊ុន ដែលរួមមានទាំងការដំឡើងប្រាក់ឈ្នួល៣៥ភាគរយ ក្នុងរយៈពេល៤ឆ្នាំ។