ក្រសួងអប់រំយុវជន និងកីឡា បានពិនិត្យឃើញថា ក្នុងរយៈពេលជិត២សប្តាហ៍កន្លងមកនេះ បណ្តាគណៈគ្រប់គ្រងសាលា សហការជាមួយអាជ្ញាធរមូលដ្ឋានក្នុងឃុំសង្កាត់ខ្លួន បើកយុទ្ធនាការផ្សព្វផ្សាយ កៀរគរ អោយមាតាបិតា អាណាព្យាបាលយកកូនតូចគ្រប់អាយុ៦ឆ្នាំចុះឈ្មោះចូលរៀនថ្នាក់ទី១ គ្រប់រូបភាព បានយ៉ាងផុសផុល។ ក្រសួងអប់រំ ជំរុញសាលារៀន និងអាជ្ញាធរមូលដ្ឋានបន្តការផ្សព្វផ្សាយនេះ ដើម្បីឲ្យកូនតូចគ្រប់អាយុ៦ឆ្នាំចូលរៀនទាំងអស់គ្នា។
លោកស្រី ឃួន វិច្ឆិកា អ្នកនាំពាក្យក្រសួងអប់រំយុវជន និងកីឡា បានថ្លែងបានថ្លែងប្រាប់BTV ថ្ងៃទី២៤ ខែតុលានេះថា រៀងរាល់ឆ្នាំ ក្រសួងអប់រំ យុវជន និងកីឡា តែងតែរៀបចំយន្តការជាច្រើនជំរុញការចុះឈ្មោះប្អូនៗគ្រប់អាយុ៦ឆ្នាំចូលរៀនថ្នាក់ទី១ ក្នុងនោះក្រៅពីសហការជាមួយអាជ្ញាធរដែនដី និងគ្រប់ភាគីពាក់ព័ន្ធទាំងអស់ ក្រសួងក៏មានការជូនដំណឹងនៅតាមបណ្តាប្រព័ន្ធផ្សព្វផ្សាយទាំងអស់របស់ក្រសួង ជូនទៅដល់មាតាបិតា អាណាព្យាបាលនាំកូនតូចគ្រប់អាយុ៦ឆ្នាំចុះឈ្មោះចូលរៀនផងដែរ។
លោកស្រី ឃួន វិច្ឆិកា បន្តថា ឆ្នាំនេះ ក្រសួងក៏បានថ្លែងអំណរគុណទៅគណៈគ្រប់គ្រងសាលា អាជ្ញាធរដែនដី អាចារ្យ ព្រះសង្ឃតាមវត្តអារាម និងភាគីពាក់ព័ន្ធទាំងអស់ សហការបានល្អផ្សព្វផ្សាយទៅតាមទម្រង់រូបភាពផ្សេងៗគ្នា ធ្វើយ៉ាងណាជំរុញក្មេងៗគ្រប់អាយុ៦ឆ្នាំក្នុងឃុំ ភូមិរបស់ខ្លួនអញ្ជើញចុះឈ្មោះចូលរៀនទាំងអស់គ្នា។
បណ្តាសាលាបឋមសិក្សាមួយចំនួននៅក្រុងតាខ្មៅ ខេត្តកណ្តាលថ្លែងថា យុទ្ធនាការផ្សព្វផ្សាយប្រកាសឲ្យអាណាព្យាបាលនាំកូនតូចគ្រប់អាយុ៦ឆ្នាំចូលរៀននេះ គឺបានចាប់ផ្តើមធ្វើដំបូងនៅថ្ងៃទី១៤ ខែតុលា ហើយភ្លាមនោះមានអាព្យាបាលជាហូរហែរបាននាំកូនតូចចុះឈ្មោះចូលរៀន ខណៈសាលារៀនមួយចំនួននៅថ្ងៃទី២៥ ខែតុលា នឹងចាប់ផ្តើមបិទឈ្មោះកូនតូចៗទាំងនោះតាមបន្ទប់ថ្នាក់រៀន ហើយសាលាក៏នឹងនៅតែបន្តទទួលការចុះឈ្មោះក្មេងៗចូលរៀនរហូតដល់ថ្ងៃបើកបវេសនកាល នៅថ្ងៃទី១ ខែវិច្ឆិកា ឆ្នាំ២០២៤នេះ។
សូមបញ្ជាក់ថា សម្រាប់ការសិក្សារបស់កុមារនៅក្នុងឆ្នាំសិក្សានេះ បណ្តាសាលារៀនមួយចំនួន នឹងមានកម្មវិធីផ្តល់អាហារនៅក្នុងសាលារៀន បំណងរក្សាទុកកុមារចូលរៀនផង និងជួយសម្រាលជីវភាពអាណាព្យាបាលផងដែរ ហើយសម្រាប់កុមារតូចណាស្ថិតក្នុងបន្ទុកគ្រួសារក្រីក្រ រាជរដ្ឋាភិបាលក៏នឹងមានផ្តល់អាហារូបករណ៍ផងដែរ៕ អត្ថបទ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
