ក្រុមមន្ត្រីបាននិយាយថា សំរាមដែលដឹកដោយបាឡុងរបស់កូរ៉េខាងជើង បានធ្លាក់ទៅលើបរិវេណវិមានប្រធានាធិបតីនៅកណ្តាលទីក្រុងសេអ៊ូល នៅថ្ងៃព្រហស្បតិ៍ (២៤ តុលា) ដោយជាករណីទីពីរហើយក្នុងពេលប៉ុន្មានខែថ្មីៗនេះ ដែលបង្កើនការព្រួយបារម្ភពីភាពងាយរងគ្រោះនៃទីតាំងសំខាន់ៗរបស់កូរ៉េខាងត្បូង អំឡុងពេលការវាយប្រហារណាមួយរបស់កូរ៉េខាងជើង។

ឧបទ្ទវហេតុនេះកើតឡើងបន្ទាប់ពីកូរ៉េទាំងពីរបានបង្កើនការគំរាមកំហែង និងវោហាសាស្ត្រប្រឆាំងនឹងគ្នាទៅវិញទៅមក ជុំវិញការអះអាងរបស់កូរ៉េខាងជើង ដែលថាកូរ៉េខាងត្បូង បានបង្ហោះយានដ្រូនឆ្លងកាត់រដ្ឋធានីព្យុងយ៉ាង ដើម្បីផ្សព្វផ្សាយខិត្តប័ណ្ណឃោសនាក្នុងខែនេះ។

សេវាសន្តិសុខប្រធានាធិបតីកូរ៉េខាងត្បូង បាននិយាយនៅក្នុងសេចក្តីថ្លែងការណ៍មួយថា បាឡុងមួយគ្រាប់ដែលបណ្ដែតដោយកូរ៉េខាងជើង បានផ្ទុះពីលើបរិវេណវិមានប្រធានាធិបតីកូរ៉េខាងត្បូងនៅព្រឹកថ្ងៃព្រហស្បតិ៍ បង្កឱ្យសំរាមជាច្រើនធ្លាក់ទៅលើដី ប៉ុន្តែមិនមានវត្ថុគ្រោះថ្នាក់អ្វីនៅក្នុងនោះទេ។ សូមបញ្ជាក់ថា កូរ៉េខាងជើង បានបញ្ជូនបាឡុងសំរាមចូលទៅកូរ៉េខាងត្បូង ចាប់តាំងពីចុងខែឧសភាមក ក្នុងការបន្តយុទ្ធនាការចិត្តសាស្ត្របែបសង្គ្រាមត្រជាក់។

កូរ៉េខាងជើង បានចោទកូរ៉េខាងត្បូង ថាបង្ហោះយានដ្រូនទម្លាក់ខិត្តប័ណ្ណឃោសនាលើទីក្រុងព្យុងយ៉ាង ចំនួនបីដងក្នុងខែនេះ ហើយបានគំរាមឆ្លើយតបផ្នែកយោធា ប្រសិនបើកើតឡើងម្តងទៀត។ កូរ៉េខាងត្បូង បានបដិសេធមិនបញ្ជាក់ថាតើខ្លួនបានបញ្ជូនយានដ្រូនឬអត់នោះទេ ប៉ុន្តែបានព្រមានថា កូរ៉េខាងជើងនឹងប្រឈមមុខនឹងការបញ្ចប់របប ប្រសិនបើសុវត្ថិភាពរបស់ពលរដ្ឋកូរ៉េខាងត្បូង ត្រូវបានគំរាមកំហែង៕