កាតា៖ មន្ត្រីជាន់ខ្ពស់មួយរូបរបស់ប្រទេសកាតាបានលើកឡើងកាលពីថ្ងៃអង្គារថា ប្រទេសកាតាជឿជាក់ថា ការទទួលស្គាល់រដ្ឋាភិបាលតាលីបង់នៅអាហ្វហ្គានីស្ថានមិនមែនជាចំណុចអាទិភាពទេ ហើយគួរតែផ្តោតការយកចិត្តទុកដាក់លើរដ្ឋបាលថ្មី និងដោះស្រាយបញ្ហាមនុស្សធម៌វិញប្រសើរជាង។
លោក Mutlaq Al-Qahtani បេសកជនពិសេសរបស់រដ្ឋមន្ត្រីការបរទេសកាតា បានជំរុញឱ្យបណ្ដាប្រទេសផ្សេងទៀតចូលឲ្យបានពេញដៃពេញជើង ជាមួយក្រុមតាលីបង់ក្នុងនាមជាអាជ្ញាធរតាមជាក់ស្ដែងរបស់អាហ្វហ្គានីស្ថាន ខណៈជំរុញឱ្យចលនាអ៊ីស្លាមនិយមមួយនេះធ្វើជារដ្ឋបាល "ដែលមានទំនួលខុសត្រូវខ្ពស់" និងគោរពសិទ្ធិស្ត្រីក្នុងការធ្វើការ និងក្មេងស្រីដើម្បីឲ្យបានទៅសាលារៀន។ លោក Qahtani បាននិយាយនៅក្នុងវេទិកាសន្តិសុខពិភពលោកនៅទីក្រុងដូហាថា យើងគិតថាការទទួលស្គាល់នេះមិនមែនជាចំណុចអាទិភាពទេ។ អ្វីដែលជាអាទិភាពជាងនេះគឺយើងនិយាយពីបញ្ហាមនុស្សធម៌ ការអប់រំ និងការឆ្លងកាត់របស់អ្នកដំណើរដោយសេរី។
ប្រទេសកាតាដែលកំពុងធ្វើជាម្ចាស់ផ្ទះការចរចារវាងក្រុមតាលីបង់ និងក្រុមមន្ត្រីលោកខាងលិច ដែលលោក Mutlaq បាននិយាយថា លោកកំពុងចូលរួមត្រូវគេមើលឃើញថា ជាប្រទេសមួយដែលមានឥទ្ធិពលលើចលនានេះ។ លោក Mutlaq បាននិយាយថា ផ្លូវតែមួយគត់ឆ្ពោះទៅមុខគឺផ្តល់ជូនរដ្ឋបាលចាំផ្ទះនូវការសហការ កិច្ចសហប្រតិបត្តិការ និងជំនួយបន្ថែម ប៉ុន្តែថាអាហ្វហ្កានីស្ថានគួរតែឆ្ពោះទៅរករដ្ឋាភិបាលរួមបញ្ចូលគ្នានៅក្នុងដំណើរការផ្ទៃក្នុងមួយ ដែលពលរដ្ឋអាហ្វហ្គានីស្ថានត្រូវសម្រេចចិត្តដើម្បីអនាគតរបស់ពួកគេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
