មន្ត្រីជាន់ខ្ពស់របស់ហាម៉ាស បានប្រាប់ទីភ្នាក់ងារសារព័ត៌មានរដ្ឋ RIA បន្ទាប់ពីកិច្ចពិភាក្សា នៅទីក្រុងមូស្គូថា ក្រុមសកម្មប្រយុទ្ធប៉ាឡេស្ទីនហាម៉ាស (Hamas) ចង់ឲ្យរុស្ស៊ីជំរុញប្រធានអាជ្ញាធរប៉ាឡេស្ទីន លោកម៉ាខ្មូដ អាបាស (Mahmoud Abbas) ចាប់ផ្តើមការចរចាអំពីរដ្ឋាភិបាលបង្រួបបង្រួមជាតិសម្រាប់តំបន់ហ្កាហ្សាក្រោយសង្គ្រាម។ 

លោក Mousa Abu Marzouk សមាជិកការិយាល័យនយោបាយរបស់ក្រុមហាម៉ាស បានជួបជាមួយអនុរដ្ឋមន្ត្រីការបរទេសរុស្ស៊ី លោក Mikhail Bogdanov នៅក្នុងទីក្រុងមូស្គូ។

លោក Marzouk ត្រូវបានដកស្រង់សម្តីដោយសារព័ត៌មាន RIAថា៖«យើងបានពិភាក្សាអំពីបញ្ហាដែលទាក់ទងនឹងការរួបរួមជាតិប៉ាឡេស្ទីន និងការបង្កើតរដ្ឋាភិបាលដែលគួរតែគ្រប់គ្រងតំបន់ហ្កាហ្សាស្ទ្រីបបន្ទាប់ពីសង្គ្រាម»។

RIA បានរាយការណ៍ថា លោក Marzouk បាននិយាយថា ក្រុមហាម៉ាស បានស្នើឲ្យរុស្ស៊ីលើកទឹកចិត្តលោក អាបាស ដែលកំពុងចូលរួមក្នុងកិច្ចប្រជុំកំពូល BRICS នៅទីក្រុង Kazan ប្រទេសរុស្ស៊ី ដើម្បីចាប់ផ្តើមការចរចាអំពីរដ្ឋាភិបាលរួបរួមមួយ។

លោក អាបាស ជាប្រធានអាជ្ញាធរប៉ាឡេស្ទីន (PA) ដែលជាស្ថាប័នគ្រប់គ្រងទឹកដីប៉ាឡេស្ទីនដែលបានកាន់កាប់ដោយអ៊ីស្រាអែល។