ប្រភពសន្តិសុខលីបង់ បានប្រាប់សារព័ត៌មាន Reuters ថា ការវាយប្រហាររបស់អ៊ីស្រាអែល កាលពីថ្ងៃពុធ (ទី២៣ ខែតុលា) បានបំផ្លាញការិយាល័យមួយដែលប្រើប្រាស់ដោយប្រព័ន្ធផ្សព្វផ្សាយគាំទ្រអ៊ីរ៉ង់ គឺ Al-Mayadeen។

ចំណែកប្រភពសន្តិសុខ ២ផ្សេងទៀត បានបញ្ជាក់អះអាងថា ការិយាល័យនេះ ត្រូវបានខូចខាតដោយសារការវាយប្រហាររបស់អ៊ីស្រាអែលលើអគារច្រើនជាន់មួយខ្នង។

គួរបញ្ជាក់ថា ការវាយប្រហារតាមអាកាសរបស់អ៊ីស្រាអែលបានវាយប្រហារតំបន់ជាយក្រុងបេរូតភាគខាងត្បូង កាលពីល្ងាចថ្ងៃពុធ ដោយបានបង្កឲ្យមានជាអណ្តាតភ្លើងខាបឆេះយ៉ាងសន្ធោសន្ធៅបាញ់ឆ្ពោះទៅលើមេឃនាពេលយប់ ពោលគឺភ្លាមៗបន្ទាប់ពីអ្នកនាំពាក្យយោធាអ៊ីស្រាអែលបានចេញការព្រមានឲ្យជម្លៀសចេញ សម្រាប់តំបន់នោះ។

អ៊ីស្រាអែលបានវាយប្រហារយ៉ាងខ្លាំងក្លាទៅលើក្រុមហេសបូឡា ដោយបានសម្លាប់មេដឹកនាំរបស់ក្រុមនេះ គឺលោក Sayyed Hassan Nasrallah រួមជាមួយនឹងមេបញ្ជាការជាន់ខ្ពស់ផ្សេងទៀត ហើយប្រើប្រាស់ការវាយប្រហារតាមអាកាស ដើម្បីសង្គ្រុបលើបន្ទាយរបស់ក្រុមនេះ នៅភាគខាងត្បូង ជ្រលងភ្នំ Bekaa និងជាយក្រុងភាគខាងត្បូងនៃទីក្រុងបេរូត៕