ក្រុមអ្នកតវ៉ា បានចាប់ផ្តើមប្រមូលផ្តុំគ្នានៅក្នុងរដ្ឋធានី Maputo កាលពីថ្ងៃព្រហស្បតិ៍ បន្ទាប់ពីគណបក្សកាន់អំណាច Frelimo របស់ប្រទេសម៉ូសំប៊ិក បានរក្សាអំណាចនៅក្នុងការបោះឆ្នោតថ្នាក់ជាតិក្នុងខែនេះ ដោយបានបន្ថែមពេលការគ្រប់គ្រងរយៈពេលប្រាំទសវត្សរ៍របស់គណបក្ស នៅក្នុងរដ្ឋអាហ្វ្រិកខាងត្បូងមួយនេះ ខណៈក្រុមប្រឆាំង ចោទប្រកាន់ថាមានការក្លែងបន្លំ។

ក្រុមអ្នកតវ៉ា បានបិទផ្លូវ និងបានដុតកង់រថយន្ត ដើម្បីឆ្លើយតបទៅនឹងលទ្ធផលបោះឆ្នោត ដ៏ចម្រូងចម្រាស។

លោក Daniel Chapo របស់គណបក្ស Frelimo អាយុ៤៧ឆ្នាំ នឹងបន្តតំណែងប្រធានាធិបតី លោក Filipe Nyusi ដើម្បីក្លាយជាប្រធានាធិបតីទី៥ របស់ប្រទេសម៉ូសំប៊ិក ចាប់តាំងពីការទទួលបានឯករាជ្យ ពីប្រទេសព័រទុយហ្គាល់ ក្នុងឆ្នាំ១៩៧៥ ។ លោក Nyusi នឹងចុះចេញពីតំណែង បន្ទាប់ពីបានកាន់តំណែងអតិបរមាពីរអាណត្តិ។

គណៈកម្មការរៀបចំការបោះឆ្នោត បាននិយាយកាលពីថ្ងៃព្រហស្បតិ៍ថា លោក Chapo បានទទួលសំឡេងគាំទ្រជាង ៧០% ។ លោក វេនណាស៊ីញ៉ូ ម៉ុនឡាណេ(Venancio Mondlane) ដែលគាំទ្រដោយគណបក្ស Podemos បានជាប់ចំណាត់ថ្នាក់ទីពីរ ដោយទទួលបានសំឡេងឆ្នោត ២០%។

លោក Mondlane ដែលមាននិន្នាការគាំទ្រអ្នកបោះឆ្នោតវ័យក្មេងជាច្រើនក្នុនៅក្នុងប្រទេស អះអាងថាលោកគឺជាអ្នកទទួលជ័យជម្នះក្នុងការបោះឆ្នោតពិតប្រាកដ បានអំពាវនាវឲ្យមានការតវ៉ា នៅទូទាំងប្រទេស កាលពីថ្ងៃព្រហស្បតិ៍ និងថ្ងៃសុក្រ ទី២៥ ខែតុលានេះ។