ក្រុមអ្នកជួយសង្គ្រោះហ្វីលីពីន បានព្យាយាមទប់ទល់នឹងជំនន់ទឹកភ្លៀងនៅថ្ងៃនេះ ដើម្បីទៅដល់អ្នកស្រុកដែលនៅតែជាប់នៅលើដំបូលផ្ទះរបស់ពួកគេ ខណៈព្យុះត្រូពិក Trami បានបោះពួយទៅកាន់សមុទ្រ បន្ទាប់ពីបានសម្លាប់មនុស្សយ៉ាងហោចណាស់៤៦ នាក់ ។

Trami ដែលប្រទេសនេះ ស្គាល់ថាជាព្យុះត្រូពិក Kristine ដ៏ធ្ងន់ធ្ងរ បានវាយប្រហារកោះដ៏ធំ Luzon និងនាំមកនូវភ្លៀងធ្លាក់ បង្កជាទឹកជំនន់ និងបំណាក់ដីដ៏មហន្តរាយកាលពីថ្ងៃពុធសប្ដាហ៍នេះ។ 

មនុស្សរាប់ម៉ឺននាក់នៅតែជម្លៀសខ្លួនចេញ បន្ទាប់ពីបានភៀសខ្លួនចេញពីទឹកជំនន់ បណ្តាលមកពីភ្លៀងធ្លាក់ខ្លាំង ដែលបានធ្វើឱ្យមានជំនន់ទឹកភ្លៀងជាថ្មីទៀត ក្រោយរងគ្រោះពីព្យុះទីហ្វុង Yagi កាលពីខែកញ្ញា។  

លោក Andre Dizon ស្នងការនគរបាលប្រចាំតំបន់ Bicol ដែលរងគ្រោះខ្លាំង បានប្រាប់សារព័ត៌មាន AFP ថា មនុស្សជាច្រើននៅតែជាប់នៅលើដំបូលផ្ទះរបស់ពួកគេ ហើយសុំជំនួយ ។ យើងសង្ឃឹមថា ទឹកជំនន់នឹងស្រកនៅថ្ងៃនេះ ព្រោះភ្លៀងឈប់ធ្លាក់ហើយ។

ស្របពេលព្យុះTrami បានបោកបក់ចាកចេញពីប្រទេសហ្វីលីពីននៅព្រឹកព្រលឹមថ្ងៃសុក្រនេះ ព្យុះនេះបានបោះពួយទៅភាគខាងលិចលើសមុទ្រចិនខាងត្បូង ចំនួនអ្នកស្លាប់ដោយសារខ្យល់ព្យុះបានកើនឡើង ខណៈរបាយការណ៍ថ្មីៗស្ដីពីជនរងគ្រោះបានរាយការណ៍ជាបន្តបន្ទាប់។

នៅក្នុងខេត្ត Batangas ភាគខាងត្បូងនៃរដ្ឋធានីម៉ានីល កងកម្លាំងនគរបាលបានប្រាប់សារព័ត៌មាន AFP ថា សាកសពមិនស្គាល់អត្តសញ្ញាណចំនួន៦ នាក់ ត្រូវបានរកឃើញនៅក្នុងភូមិ Sampaloc ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា តំបន់ជាច្រើននៃខេត្តនេះ នៅតែមិនអាចចូលទៅដល់ដើម្បីស្វែងរក និងសង្រ្គោះ ៕