អាជ្ញាធរប្រទេសហៃទី បាននិយាយកាលពីថ្ងៃព្រហស្បតិ៍ថា យ៉ាងហោចណាស់សមាជិកក្រុមជនអន្ធពាលចំនួន៥០នាក់ ត្រូវបានសម្លាប់ក្នុងការវាយប្រហារនៅទីក្រុងឆ្នេរ Arcahaie ភាគខាងលិចប្រទេសហៃទី។

លោកវីន័រ រ៉េណេ( Wilner Rene) មន្ត្រីមកពីទីភ្នាក់ងារការពារជនស៊ីវិលរបស់ប្រទេសហៃទី បាននិយាយថា ខណៈជនអន្ធពាលភាគច្រើន ត្រូវបាននគរបាលបាញ់ ប៉ុន្តែយ៉ាងហោចណាស់មនុស្សជាង១០នាក់ បានលង់ទឹកស្លាប់ នៅពេលដែលទូករបស់ពួកគេមានផ្ទុកគ្រាប់រំសេវសម្រាប់ក្រុមជនអន្ធពាលវាយប្រហារនៅទីក្រុង បានបុកថ្មប៉ប្រះទឹក ហើយបានក្រឡាប់។

លោក Rene និយាយថា ការវាយប្រហារកើតឡើងនៅទីក្រុងឆ្នេរ Arcahaie ស្ថិតនៅចម្ងាយប្រហែល៥០ គីឡូម៉ែត្រភាគពាយព្យរដ្ឋធានី ព័រ ពូប្រាំង។

អ្នកវាយប្រហារប្រដាប់អាវុធ កាលពីពេលដំបូង បានលាក់ខ្លួននៅក្នុងតំបន់ក្បែរៗនោះ មុនពេលត្រូវបានរកឃើញដោយនគរបាល។ ការវាយប្រហារនេះ គឺជាផ្នែកមួយនៃរលកអំពើហិង្សារាលដាល ដែលបានញាំញីនៅក្នុងប្រទេសហៃទី ក្នុងប៉ុន្មានឆ្នាំថ្មីៗនេះ ដែលជំរុញដោយវិបត្តិនយោបាយ និងវិបត្តិសង្គម កាន់តែជ្រៅឡើង។

ចាប់តាំងពីការធ្វើឃាតប្រធានាធិបតី លោក ចូវេនែល ម៉ៅអ៊ីស(Jovenel Moise) ក្នុងឆ្នាំ២០២១ ប្រទេសហៃទី បានប្រឈមមុខទៅនឹងការខ្វះឥទ្ធិពលដែលបានធ្វើឲ្យក្រុមជនអន្ធពាលប្រដាប់អាវុធ ដណ្តើមការគ្រប់គ្រងនៅផ្នែកធំៗរបស់ទីក្រុង ជាពិសេសនៅទីក្រុងព័រអូប្រាំង។ គួបផ្សំទៅនឹងកង្វះធនធានជាមូលដ្ឋាន អំពើហិង្សាបានបណ្តាលឲ្យប្រជាជនជាង ៧០០.០០០នាក់ភៀសខ្លួន ហើយមនុស្សរាប់ពាន់នាក់ស្លាប់ និងបានបង្កឲ្យមានវិបត្តិមនុស្សធម៌នៅក្នុងប្រទេសកាន់តែធ្ងន់ធ្ងរ។