អនុវត្តតាមការណែនាំក្រសួងសុខាភិបាល ក្នុងខែវិច្ឆិកាឆ្នាំ២០២៤នេះ បណ្តាក្រុមគ្រូពេទ្យ និង​មន្ត្រី​សុខាភិបាលនានានៅទូទាំងខេត្តកណ្តាល ក៏ដូចក្រុមមន្ត្រីសុខាភិបាល​នានា​នៅ​ទូទាំង​ប្រទេស នឹងបើកយុទ្ធនាការចុះចាក់វ៉ាក់សាំងបង្ការជំងឺកញ្ជ្រឹល ស្អូច ជូនកូនតូច​ដែល​មាន​អាយុ​ចាប់​ពី​៩ខែ ដល់៥ឆ្នាំ នៅតាមឃុំសង្កាត់ ភូមិ សហគមន៍ ដើម្បីការពារការស្លាប់ ការពារការ​កើត​ជំងឺ​នានា​ទៀត និងការកាត់បន្ថយភាពក្រីក្ររបស់ពលរដ្ឋ។

លោកទន្តបណ្ឌិត ហម សុផល ប្រធានការិយាល័យសុខាភិបាលស្រុកប្រតិបត្តិតាខ្មៅ បាន​ថ្លែង​ប្រាប់​BTV នៅថ្ងៃទី២៥ ខែតុលានេះ ថា នៅពេលនេះការិយាល័យសុខាភិបាលស្រុក បាន​ទទួល​សម្ភារៈ និងថ្នាំវ៉ាក់សាំងបង្ការជំងឺកញ្ជ្រឹល ស្អូចអស់ហើយ ហើយក៏​បាន​រៀបចំ​បែង​ចែក​ជូន​ទៅ​តាម​មណ្ឌល​សុខភាពតាមឃុំសង្កាត់អស់ហើយដែរ ហើយ នៅថ្ងៃទី១ ដល់ថ្ងៃទី១៣ ខែវិច្ឆិកានេះ ក្រុម​មន្ត្រីសុខាភិបាល និងក្រុមពេទ្យនៅតាមណ្ឌលសុខភាពនានានោះ នឹង​ចុះដា​ក់​ប៉ុស្តិ៍​ផ្តល់​ថ្នាំ​បង្ការ​នេះ នៅតាមភូមិ សហគមន៍ដែលនៅជិតខ្នងផ្ទះរបស់ពលរដ្ឋ។

បើតាមក្រុមពេទ្យតាមមណ្ឌលសុខភាព និងចៅសង្កាត់តាក្តុល បានថ្លែងថា នៅពេលនេះ ក្រុម​ពេទ្យ និងក្រុមការងារនៅតាមឃុំសង្កាត់ មានមេភូមិ និងមន្ត្រីស្ម័គ្រចិត្តភូមិនានាទៀត បាន​ចុះ​ផ្សព្វ​ផ្សាយ​តាម​ខ្នងផ្ទះជាបណ្តើរៗ ហើយនៅតាមមណ្ឌលសុខភាព និងតាមឃុំសង្កាត់នានា ក៏បាន​លើក​​ស្លាកបដាផ្សព្វផ្សាយឲ្យអណាព្យាបាល មាតាបិតានានានាំកូនតូចអាយុ៩ខែ ដល់៥ឆ្នាំ មក​ទទួលថ្នាំបង្ការជំងឺកញ្ជ្រឹលស្អូចដោយឥតគិតថ្លៃនៅដើមខែវិច្ឆិកានេះទាំងអស់គ្នា បើទោះ​កូន​តូច​នោះ មិនធ្លាប់ចាក់ ឬ ធ្លាប់បានចាក់វ៉ាក់សាំងនេះពីមុនមកក៏ដោយ។

សូមបញ្ជាក់ថា ក្រសួងសុខាភិបាល ដោយមានការផ្តល់ជំនួយគាំទ្រពីអង្គការសុខភាពពិភពលោក WHO , Gavi, unicef, មូលនិធីក្លិនតុន អង្គការ Australian Aid ប្រកាស​ផ្តល់​ថ្នាំ​វ៉ាក់​សាំង​បង្ការ​ជំងឺ​កញ្ជ្រឹល ស្អូចនេះ ជូនកូនតូចអាយុចន្លោះ៩ខែ ទៅដល់៥ឆ្នាំ ដែលថ្នាំវ៉ាក់សាំងនេះ មាន​ប្រសិទ្ធ​ភាព និងធនាបាននូវការការពារការស្លាប់ ការពារជំងឺងងឹតភ្នែក ថ្នង់ រលាកខួរក្បាល រលាក​សួត ការពារបេះដូងពីកំណើត និងជំងឺអន់ថយស្មារតីជាដើម៕ អត្ថបទ ស៊ុម សុខជា