ប្រធានាធិបតីរុស្ស៊ី លោក Vladimir Putin កាលពីថ្ងៃព្រហស្បតិ៍ (ទី២៤ ខែតុលា) បាននិយាយថា កិច្ចសហប្រតិបត្តិការយោធារបស់ប្រទេសលោកជាមួយកូរ៉េខាងជើង គឺជា «កិច្ចការផ្ទាល់ខ្លួនរបស់ពួកយើង» ខណៈដែលលោកបានឆ្លើយសំណួរអំពីការបញ្ជូនកងទ័ពរបស់ទីក្រុងព្យុងយ៉ាងទៅជួយគាំទ្រសង្រ្គាមរបស់រុស្ស៊ី នៅអ៊ុយក្រែន។

សារព័ត៌មាន Reuters, Bloomberg និងបណ្តាញផ្សព្វផ្សាយផ្សេងទៀត បានរាយការណ៍ថា លោក Putin បានធ្វើការកត់សម្គាល់បែបនេះ អំឡុងពេលមានសន្និសីទសារព័ត៌មានតូចមួយនៅក្រៅកិច្ចប្រជុំកំពូល BRICS នាទីក្រុង Kazan បន្ទាប់ពីទីក្រុងវ៉ាស៊ីនតោន និងសេអ៊ូល បានអះអាងថា កូរ៉េខាងជើងបានបញ្ជូនទាហានប្រហែល ៣.០០០នាក់ទៅកាន់ភាគខាងកើតប្រទេសរុស្ស៊ីតាមនាវាកាលពីដើមខែនេះ។

ជាពិសេស លោកបានលើកឡើងពីមាត្រាទី៤ នៃសន្ធិសញ្ញា «ភាពជាដៃគូយុទ្ធសាស្ត្រគ្រប់ជ្រុងជ្រោយ» ជាមួយកូរ៉េខាងជើង ដែលរួមបញ្ចូលទាំងកថាខណ្ឌការពារគ្នាទៅវិញទៅមក។ លោកត្រូវបានដកស្រង់ដោយសារព័ត៌មាន Reuters ដែលបានប្រាប់ថា៖ «មានមាត្រាទី៤។ យើងមិនមានអ្វីត្រូវសង្ស័យនោះឡើយដែលយ៉ាងហោចណាស់ថា មេដឹកនាំកូរ៉េខាងជើងយកចិត្តទុកដាក់លើកិច្ចព្រមព្រៀងរបស់ពួកយើង។ ហើយអ្វីដែលពួកយើងធ្វើក្នុងក្របខ័ណ្ឌនៃមាត្រានេះ គឺជាកិច្ចការផ្ទាល់ខ្លួនរបស់ពួកយើង»។

គួរបញ្ជាក់ថា មេដឹកនាំកូរ៉េខាងជើង លោក គីម ជុងអ៊ុន និងលោក Putin បានចុះហត្ថលេខាលើសន្ធិសញ្ញានេះ អំឡុងកិច្ចប្រជុំកំពូលនៅទីក្រុងព្យុងយ៉ាង កាលពីខែមិថុនា។ សន្ធិសញ្ញានេះអំពាវនាវឲ្យភាគីម្ខាងផ្តល់ជំនួយយោធាដល់ភាគីម្ខាងទៀត «ដោយមិនបង្អង់យូរ« នៅក្នុងករណីមានការលុកលុយដោយប្រដាប់អាវុធ ជាកិច្ចព្រមព្រៀងដែលមនុស្សជាច្រើនបាននិយាយថា ស្មើនឹងការធ្វើឲ្យដំណើរការឡើងវិញនូវសម្ព័ន្ធភាពយោធាសម័យសង្រ្គាមត្រជាក់របស់ប្រទេសទាំង២៕