នៅថ្ងៃសុក្រនេះ ក្រុមប្រជាពលរដ្ឋ និងក្រុមការងារជួយសង្រ្គោះ បានព្យាយាមប្រឹងជីកកាយគំនរភក់ និងកម្ទេចកម្ទី ដើម្បីទាញជនរងគ្រោះ ហើយនិងសាកសពចេញពីបំណាក់ដីនៅខេត្ត Batangas ស្របពេលរងការវាយប្រហារពីព្យុះត្រូពិក Trami ។

នៅក្នុងខេត្ត Batangas ភាគខាងត្បូងនៃរដ្ឋធានីម៉ានីល កងកម្លាំងនគរបាលបាននិយាយប្រាប់សារព័ត៌មាន AFP ថា សាកសពមិនស្គាល់អត្តសញ្ញាណចំនួន៦ នាក់ ត្រូវបានរកឃើញនៅក្នុងភូមិ Sampaloc ។ 

ប្រព័ន្ធផ្សព្វផ្សាយក្នុងស្រុកបានរាយការណ៍ថា តំបន់ជាច្រើននៃខេត្តមួយនេះ នៅតែមិនអាចចូលទៅដល់ដើម្បីសង្រ្គោះពលរដ្ឋបានឡើយ ជាហេតុនាំឲ្យមានការព្យាករណ៍ថា ចំនួនមនុស្សស្លាប់ អាចនឹងបន្តកើនឡើងបន្ថែមទៀត ។

ក្រុមមន្រ្តីបាននិយាយកាលពីថ្ងៃព្រហស្បតិ៍ថា ព្យុះត្រូពិក Trami បានសម្លាប់មនុស្សយ៉ាងហោច ២៦នាក់ និងបង្ខំឲ្យមនុស្សជាង ១៥ម៉ឺននានក់ រត់ភៀសខ្លួនចេញពីផ្ទះសម្បែងរបស់ពួកគេនៅប្រទេសហ្វីលីពីន ក្រោយវាបោកបក់ដល់ដីគោកនៅតំបន់ឆ្នេរភាគឦសាន ។

ព្យុះ Trami បាននាំមកជាមួយភ្លៀងធ្លាក់ខ្លាំងនៅលើកោះ Luzon បង្កឲ្យកើតមានទឹកជំនន់ និងបំណាកដីទ្រង់ទ្រាយធំ ។

មន្ទីរឧតុនិយមហ្វីលីពីន និយាយថា ព្យុះទីហ្វុង គឺជារឿងធម្មតាទេនៅក្នុងប្រទេសហ្វីលីពីននៅអំឡុងពេលនេះ ប៉ុន្តែភ្លៀងបង្កឡើងដោយសារព្យុះ Trami បានធ្លាក់ខ្លាំងខុសពីប្រក្រតី ។

ជាទូទៅ ប្រទេសហ្វីលីពីន ទទួលរងការវាយប្រហារប្រចាំឆ្នាំដោយសារព្យុះទីហ្វុងជាមធ្យមចំនួន ២០លើក ហើយព្យុះទាំងអស់នោះតែងតែបង្កឲ្យកើតមានភ្លៀងធ្លាក់ខ្លាំង ខ្យល់បក់ខ្លាំង និងបំណាក់ដីស្លាប់មនុស្ស ៕