ប្រធានាធិបតីអ៊ុយក្រែន លោក Volodymyr Zelenskiy នៅថ្ងៃសុក្រ (ទី២៥ ខែតុលា) នេះ បាននិយាយថា រុស្ស៊ីគ្រោងនឹងដាក់ពង្រាយទាហានកូរ៉េខាងជើងនៅសមរភូមិ ដោយចាប់ផ្តើមពីថ្ងៃទី ២៧-២៨ ខែតុលា ដោយការលើកឡើងនេះបានដកស្រង់របាយការណ៍ចារកម្ម។

នៅលើបណ្ដាញសង្គម X បន្ទាប់ពីទទួលបានរបាយការណ៍ពីមេបញ្ជាការជាន់ខ្ពស់របស់លោក លោក Zelenskiy បានប្រាប់ឲ្យដឹងថា៖ «យោងតាមការស៊ើបការណ៍សម្ងាត់ បានបង្ហាញថា ទាហានកូរ៉េខាងជើងដំបូងគេ ត្រូវបានគេរំពឹងថា នឹងត្រូវបានរុស្ស៊ីដាក់ពង្រាយយ៉ាងឆាប់ នៅតំបន់ប្រយុទ្ធនានា នៅថ្ងៃទី ២៧-២៨ ខែតុលា។ នេះគឺជាការបង្កើននូវភាពតានតឹងយ៉ាងច្បាស់ណាស់របស់រុស្ស៊ី»។

តែយ៉ាងណាក្ដី លោក Zelenskiy មិនបាននិយាយពីសមរភូមិជួរមុខណាដែលទាហានកូរ៉េខាងជើងត្រូវបានគេរំពឹងថា នឹងត្រូវបញ្ជូនទៅ ឬផ្តល់ព័ត៌មានលម្អិតផ្សេងទៀតនោះឡើយ។

គួរបញ្ជាក់ថា ចារកម្មយោធាអ៊ុយក្រែនបាននិយាយកាលពីថ្ងៃព្រហស្បតិ៍ថា អង្គភាពកូរ៉េខាងជើងដំបូង ត្រូវបានកត់ត្រារួចហើយ នៅក្នុងតំបន់ព្រំដែន Kursk របស់រុស្ស៊ី ជាកន្លែងដែលយោធាអ៊ុយក្រែន បាន និងកំពុងប្រតិបត្តិការ ចាប់តាំងពីការចាប់ផ្តើមនូវការលុកលុយដ៏ធំមួយ ក្នុងខែសីហា។

ចំណែកសហរដ្ឋអាមេរិកបាននិយាយថា ខ្លួនបានរកឃើញភស្តុតាងពីវត្តមានកងទ័ពកូរ៉េខាងជើង នៅរុស្ស៊ី ហើយសមាជិកសភាកូរ៉េខាងត្បូង បានប្រាប់ថា ទាហានប្រហែល ៣.០០០នាក់ ត្រូវបានបញ្ជូនទៅគាំទ្រដល់សង្គ្រាមរបស់វិមានក្រឹមឡាំងនៅអ៊ុយក្រែន ដោយអ្វីជាច្រើនទៀតនឹងកើតមានជាបន្តបន្ទាប់៕