ក្រុមមន្រ្តីប៉ាឡេស្ទីន និយាយថា ការវាយប្រហាររបស់យោធាអ៊ីស្រាអែលលើទីក្រុង Khan Younis ស្ថិតនៅភាគខាងត្បូងទីក្រុងហ្កាហ្សា បានសម្លាប់មនុស្សយ៉ាងហោច ៣៨នាក់ ចាប់តាំងពីបយ់ថ្ងៃព្រហស្បតិ៍រហូតមក ហើយកងកម្លាំងអ៊ីស្រាអែល បានបើកការវាយឆ្មក់ពេលយប់លើមន្ទីរពេទ្យនៅតំបន់ភាគខាងជើងហ្កាហ្សា ។

ក្រសួងសុខាភិបាលហ្កាហ្សា និយាយថា ភាគច្រើននៃអ្នកគ្រោះថ្នាក់ពីការវាយប្រហាររបស់អ៊ីស្រាអែលលើផ្ទះជាច្រើនខ្នងនៅទីក្រុងភាគអាគ្នេយ៍ Khan Younis គឺជាស្រ្តី និងកុមារ ។

អ្នកស្រុកមួយចំនួន បានវិលត្រឡប់ទៅកាន់កន្លែងកើតហេតុវិញនៅព្រឹកថ្ងៃសុក្រ រើកម្ទេចកម្ទីដើម្បីរើសសម្លៀកបំពាក់ និងឯកសាររបស់ពួកគេ ខណៈក្មេងៗដើររកមើលប្រដាប់ក្មេងលេងរបស់ពួកគេ ។

យោធាអ៊ីស្រាអែល និយាយនៅក្នុងសេចក្តីថ្លែងការណ៍ថា កងកម្លាំងពួកគេ បានសម្លាប់ក្រុមខ្មាន់កាំភ្លើងប៉ាឡេស្ទីន អំឡុងការវាយប្រហារតាមច្រកអាកាស និងការវាយប្រហារតាមជើងគោក នៅភាគខាងត្បូងតំបន់ហ្កាហ្សាស្រ្ទីប ហើយនិងបានកម្ទេចហេដ្ឋារចនាសម្ព័ន្ធរបស់ក្រុមជីវពលហាម៉ាស់ ។

សាក្សីម្នាក់ ដែលសុំមិនផ្តល់ឈ្មោះ និយាយថា ពួកយើងបានមើលឃើញរថក្រោះព័ទ្ធជុំវិញតំបន់នោះ ក្នុងរយៈពេល ១៥នាទី ។ មាននូវការផ្ទុះអាវុធច្រើនណាស់ ហើយយោធាអ៊ីស្រាអែល បានឲ្យមនុស្សដោះសម្លៀកបំពាក់ ហើយមាននូវមនុស្សប្រុសៗជាច្រើន ពួកគេបានចោលគ្រាប់បែកលើផ្ទះមួយខ្នងនេះ ហើយពួកគេបាននាំយកទុក្ករបុគ្គលប្រហែល ១៣-១៤នាក់ ប្រហែលជាម៉ោង ៨យប់ រហូតដល់ម៉ោង ៣ភ្លឺកន្លះ ។ ពួកយើងនៅក្នុងផ្ទះ រហូតដល់ពួកគេចាកចេញ ។

ដោយឡែក សាក្សីម្នាក់ទៀតសុំមិនបញ្ចេញឈ្មោះដូចគ្នា និយាយថា ពួកយើងបានឮច្រើនណាស់ពីការជជែករឿងបទឈប់បាញ់ ។ ចាប់តាំងពីសង្រ្គាមផ្ទុះឡើងរហូតដល់ថ្ងៃនេះ ពួកគេនៅតែនិយាយថា នឹងមានបទឈប់បាញ់ ប៉ុន្តែគ្មានអ្វីទាល់តែសោះ ៕