នៅជុំវិញរដ្ឋធានី Mogadishu របស់ប្រទេសសូម៉ាលី កាមេរ៉ាសុវត្ថិភាពរាប់ពាន់គ្រឿង ត្រូវបានដំឡើងគ្រប់ទីកន្លែងនៅក្នុងទីក្រុងមួយនេះ ។

គោលបំណងសំខាន់នៃការដំឡើងកាមេរ៉ាសុវត្ថិភាពទាំងអស់នេះ គឺដើម្បីតាមដាន និងចាប់យកសកម្មភាពរបស់ក្រុមជីវពល al Shabaab ។

ការបំផ្ទុះគ្រាប់ និងការផ្ទុះអាវុធអស់រយៈពេលជិត ២ទសវត្សរ៍ បានយាយីទីក្រុង Mogadishu ស្របពេលដែលក្រុមអ៊ីស្លាម បន្តសង្រ្គាមរបស់ពួកគេ ដើម្បីផ្តួលរំលំរដ្ឋាភិបាលសូម៉ាលី ។

ប៉ុន្តែនៅក្នុងទីក្រុងដែលក្រុមជីវពលមានភ្នែកម្នាស់គ្រប់ទីកន្លែងនោះ ធុរកិច្ចមួយចំនួនដែលមានដំឡើងកាមេរ៉ាសុវត្ថិភាព បានរងការវាយប្រហារ ។

យោងតាមការអះអាងរបស់មន្រ្តីមួយរូប បានឲ្យដឹងថា មនុស្សយ៉ាងហោច ៣នាក់ ត្រូវបានសម្លាប់ និងមនុស្ស ៤នាក់ផ្សេងទៀត រងរបួស នៅក្នុងការវាយប្រហាលើធុរកិច្ច ចាប់តាំងពីដើមខែតុលា ។

ពាណិជ្ជករជាច្រើន និយាយប្រាប់ទីភ្នាក់ងារព័ត៌មានរ៉យទ័រថា ក្រុមជីវពល al Shabaab បានបញ្ជាឲ្យពួកគេដោះចេញកាមេរ៉ាសុវត្ថិភាព ប៉ុន្តែក្រុមមន្រ្តីរដ្ឋាភិបាលសូម៉ាលី ព្រមានថា ពួកគេអាចនឹងប្រឈមជាមួយផលវិបាក សម្រាប់ការធ្វើតាមបញ្ជារបស់ក្រុមឧទ្ទាម ។

លោក Mohamed Ahmed Diriye គឺជាអភិបាលរងក្រុង Mogadishu ទទួលបន្ទុកកិច្ចការសន្តិសុខ និងនយោបាយនិយាយថា បន្ទាប់ពីកិច្ចខិតខំទាំងនេះ ពួកយើងជោគជ័យក្នុងការបញ្ចុះបញ្ចូលឲ្យប្រជាពលរដ្ឋដំឡើងកាមេរ៉ាសុវត្ថិភាព ។

លោកបន្តថា ពេលកាមេរ៉ាសុវត្ថិភាព ត្រូវបានដំឡើងនៅក្នុងផ្សារ Bakara មាននូវការបំផ្ទុះគ្រាប់ដែលមានគោលដៅបំផ្លាញកាមេរ៉ាសុវត្ថិភាព ហើយក្រុមភេរវករ បានគំរាមអ្នកស្រុកថា ពួកគេនឹងវាយប្រហារអ្នករាល់គ្នា និងធុរកិច្ចរបស់ពួកគេ ដែលបានដំឡើងកាមេរ៉ាសុវត្ថិភាព ។

លោកបានបញ្ជាក់ទៀតថា កងកម្លាំងសន្តិសុខចារកម្មយ៉ាងច្រើន ស្លៀកពាក់ស៊ីវិល ត្រូវបានដាក់ពង្រាយទៅកាន់ផ្សារ Bakara ហើយនិងស្នាក់នៅទីនោះទាំងយប់ថ្ងៃទាំងថ្ងៃ ដើម្បីធានាសុវត្ថិភាពដល់ការដំឡើងកាមេរ៉ា រហូតដល់អ្នកស្រុកស៊ាំនឹងកាមេរ៉ា ។

ទោះបីជាក្រុមមន្រ្តីនិយាយថា កាមេរ៉ាសុវត្ថិភាពសំខាន់យ៉ាងណាក្តី ក្រុមអ្នកស្រុកមួយចំនួន និយាយថា វាបានធ្វើឲ្យពួកគេកាន់តែឈឺក្បាលមួយកម្រិតទៀត ៕