ក្រសួងទេសចរណ៍កម្ពុជា ចិន បានរៀបចំពិព័រណ៍ ម្ហូបអាហាររយៈពេលពីរថ្ងៃខេតដ្ដនៅសៀមរាប ដែល​ពិព័រណ៍ធ្វើឡើងនៅសួនច្បារព្រះរាជដំណាក់ក្រុងសៀមរាប ចាប់ពីថ្ងៃទី២៥ដល់ថ្ងៃទី២៦ ខែតុលា ឆ្នាំ២០២៤​នេះ​។

ឯកឧត្ដម ហួត ហាក់ រដ្ឋមន្ដ្រីក្រសួងទេសចរណ៍ បានថ្លែងក្នុងពិធីបើកនូវ “ព្រឹត្តិការណ៍​ពិព័រណ៍​ម្ហូប​អាហារ​កម្ពជា-ចិន”នេះថា ការរៀបចំនូវព្រឹត្តិការណ៍នេះ បានឆ្លុះបញ្ចាំង​ឱ្យ​ឃើញនូ​វ​ការ​យក​ចិត្ត​ទុក​ដាក់ខ្ពស់របស់ប្រមុខរដ្ឋាភិបាលប្រទេសទាំងពីរ ពិសេសកិច្ចសហការ​ដ៏​ល្អរវា​ង​ក្រសួង​ទេសចរណ៍​កម្ពុជា និងរដ្ឋបាលខេត្តហៃណាន ក្នុងការពង្រឹង និងពង្រីកចំណងមិត្តភាពកម្ពុជា-ចិន ស្របតាមស្មារតីមិត្តដែកថែប និងសហគមន៍ជោគវាសនារួមកម្ពុជា-ចិន និងកិច្ច​សហ​ប្រតិបត្តិការ​ត្បូង​ពេ​ជ្ររវាងកម្ពុជា-ចិន ឱ្យកាន់តែរឹងមាំ និងខ្លាំងក្លាថែមទៀត ជាពិសេស​ការ​ជួយ​គាំទ្រ​ដល់​យុទ្ធនាការ “ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤” និងជាកា​រ​ចូលរួ​ម​ចំណែក​យ៉ាងសកម្មដល់ការអនុវត្តយុទ្ធសាស្ត្រ “ខ្សែក្រវាត់ និងផ្លូវ” ផងដែរ។

ឯកឧត្ដមបន្ដថា ពិព័រណ៍ម្ហូបអាហារកម្ពុជា-ចិន នៅពេលនេះ ត្រូវបានរៀបចំ​ឡើងដើ​ម្បីលើក​កម្ពស់​គុណ​តម្លៃ​នៃ​ម្ហូប​អាហារកម្ពុជា-ចិន បង្កើតជាផលិតផលទេសចរណ៍ដ៏ទាក់ទាញ និងចូលរួមលើកតម្កើងវប្បធម៌ អរិយធម៌ និងប្រពៃណីប្រទេសទាំងពីរ។ ព្រឹត្តិការណ៍ក៍បានប្រមូលផ្តុំគំនិត និងការចែក​រំលែក​បទ​ពិសោធន៍ ការអនុវត្តល្អៗអំពីតួនាទីដ៏សំខាន់នៃវិស័យទេសចរណ៍ផ្នែកម្ហូបអាហារ ក្នុង​ការ​ចូលរួម​សម្រេច​ការ​អភិវឌ្ឍប្រកបដោយចីរភាព និងគំនិតផ្តួចផ្តើមរបស់កម្ពុជា-ចិន ដែលនឹងក្លាយ​ជា​កាលា​នុវត្តភាពសម្រាប់ប្រទេសទាំងពីរ ក្នុងការដកស្រង់បទពិសោធន៍ពីគ្នាទៅវិញទៅមក លើការ​អភិវឌ្ឍ​ម្ហូបអាហារប្រទេសទាំងពីរ ប្រកបដោយភាពពេញចិត្ត និងបទពិសោធន៍​ល្អប្លែក។​ ឯកឧត្ដម​បន្ដថា សមាសភាពម្ហូបអាហារជាផលិតផលទេសចរណ៍ម្ហូបអាហារ រួមចំណែក​បង្កើត​ភាព​ចង​ចាំដល់ទេសចរអំពីគោលដៅដែលបានទស្សនា។ ក្នុងន័យនេះ ម្ហូបអាហារជាទូត​នាំ​សារ​អំពី​វប្បធម៌ អត្តសញ្ញាណ និងការរស់នៅក្នុងតំបន់ទៅកាន់ទេសចរជាតិ និងអន្តរជាតិ។ ការកែច្នៃ ការចងក្រងខ្លឹមសារ និងការបង្ហាញអំពីម្ហូបអាហារ នឹងចូលរួម​ចំណែក​លើក​កម្ពស់​ជីវភាព​រស់​នៅរ​បស់​ប្រជាពលរដ្ឋក្នុងតំបន់ តាមរយៈការមកដល់នៃទេសចរជាតិ និងអន្តរជាតិ។ វិជ្ជាជីវៈផ្នែកម្ហូបអាហារ ទាមទារទាំងឆន្ទៈ ចំណេះដឹង ជំនាញ ឥរិយាបថ សិល្បៈ និងគំនិតច្នៃ​ប្រឌិត ដែលមិនអាចខ្វះបាន។ ព្រឹត្តិការណ៍នេះ មិនត្រឹមតែចូលរួមទាក់ទាញទេសចរជាតិ-អន្តរ​ជាតិ​ប៉ុណ្ណោះទេ ថែមទាំងចូលរួមជំរុញសហគ្រិនភាព ការបង្កើតថ្មី និងភាពច្នៃប្រឌិត​អំពី​សិល្បៈ​នៃ​ម្ហូប​អាហារផងដែរ។

លោក Lu Qizhi ទីប្រឹក្សាស្ថានទូតចិនប្រចាំកម្ពុជា មានប្រសាសន៍ថា កម្ពុជាក៏មាន​វប្បធម៌​ដ៏​ស្រស់​ផូរផង់ រីឯវប្បធម៌ម្ហូបអាហារមានលក្ខណៈពិសេសប្លែក ការភ្លក់ឱជារស​នៃ​ម្ហូប​អាហារ​ក្នុង​ស្រុក​គឺ​ជាអ្វីដែលភ្ញៀវទេសចរចិនគួរធ្វើ បន្ទាប់ពីបានមកដល់ប្រទេសកម្ពុជា។លោកថា ម្ហូបអាហារ​បាន​ក្លាយ​ជាស្ពានមួយសម្រាប់ប្រជាជនចិននិងកម្ពុជាក្នុងការស្គាល់ពីគ្នាទៅវិញទៅមក និង​សម្រាប់​ការ​ផ្លាស់ប្តូររៀនសូត្រពីគ្នាទៅវិញទៅមករវាងអរិយធម៌ចិននិងកម្ពុជា។ លោកជឿជាក់ថា តាមរយៈកម្មវិធីសប្តាហ៍ម្ហូបអាហារនេះ មិនត្រឹមតែបានភ្លក់ពីរសជាតិអាហារឆ្ងាញ់ៗប៉ុណ្ណោះទេ ប៉ុន្ដែថែម​ទាំងបានរាប់អានមិត្តភាពដោយតាមរយៈម្ហូបអាហារ បង្កើនការយល់ដឹ​ង​ពី​គ្នា​ទៅ​វិញ​ទៅ​មក និងជំរុញការផ្លាស់ប្តូរវប្បធម៌គ្នាឱ្យកាន់តែស៊ីជម្រៅ។លោកថា ការងារបន្ទាប់ នឹងរៀបចំ​សកម្មភាព​ផ្លាស់​ប្តូរវប្បធ​ម៌​រវាង​ប្រជាជន និង​ប្រជាជន​កាន់​តែ​អស្ចារ្យ​ជា​ច្រើន​ទៀត​នៅ​ក្នុង​ខេត្ត​សៀមរាប រួមទាំងកិច្ចប្រជុំទីក្រុងចំណងមេត្រីភាពរវាងចិន-កម្ពុជា ពិព័រណ៍ទេសចរណ៍ជាដើម ដើម្បី​ប​ន្តបង្កើនប្រជាប្រិយភាពសម្រាប់ការផ្លាស់ប្ដូរប្រជាជននិងប្រជាជនរវាងចិននិងកម្ពុជា ដើម្បីចាក់ឫសគល់ឱ្យកាន់តែរឹងមាំសម្រាប់ប្រជាជនក្នុងការកសាងសហគមន៍វាសនារួមរវាងចិននិងកម្ពុជាក្នុងយុគសម័យថ្មី ប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់៕