នគរបាល និងក្រុមបាតុករ ប្រទេសបូលីវី បានប៉ះទង្គិចគ្នានៅទីក្រុង Vinto កាលពីថ្ងៃសុក្រ ខណៈ នគរបាល និងអ្នកស្រុក បានធ្វើការដើម្បីដកចេញការបិទផ្លូវ ដែលបានដាក់បិទដោយក្រុមបាតុករ។

ប្រធានគណៈកម្មាធិការទីក្រុង លោក Marco Gomez បាននិយាយថា បាតុករ គឺសុទ្ធតែជាអ្នកគាំទ្រអតីតប្រធានាធិបតីប្រទេសបូលីវីលោក Evo Morales ហើយពួកគេមកពីតំបន់ផ្សេងៗរបស់ប្រទេស។

នគរបាល ត្រូវបានគេមើលឃើញឃាត់ខ្លួនបាតុករ ខណៈអ្នកស្រុកបានរុះរើថ្ម ដើម្បីបើកផ្លូវឲ្យធ្វើចរាចរណ៍ឡើងវិញ។

អ្នកគាំទ្រលោក Morales បានបង្កើតការបិទផ្លូវនៅរដ្ឋ Cochabamba ភាគកណ្តាល រយៈពេលជាងមួយសប្តាហ៍មកហើយ ដើម្បីទាមទារឱ្យបញ្ចប់ការស៊ើបអង្កេតលើលោក Morales ចំពោះការចោទប្រកាន់ថា បានរំលោភលើអនីតិជន ក្នុងអំឡុងពេលលោកកាន់តំណែងជាប្រធានាធិបតី។