សៀមរាប ÷ ក្រុមប្រឹក្សាគណៈគ្រូពេទ្យខេត្តសៀមរាប ដោយមានការគាំទ្រពីគណៈគ្រូពេទ្យជាតិ និងមន្ទីរសុខាភិបាលនៃរដ្ឋបាលខេត្តសៀមរាប បានរៀបចំទិវាអភិវឌ្ឍន៍វិជ្ជាជីវៈវេជ្ជសាស្តបន្តលើកទី១៧ ដើម្បីចែករំលែកនូវបទពិសោធន៍ និងស្វែងរកនូវចំណេះដឹងថ្មីៗពាក់ព័ន្ធនឹងវិជ្ជាជីវៈវេជ្ជសាស្ត្រ។ទិវានេះ ធ្វើឡើងនៅថ្ងៃទី២៧ ខែតុលា ឆ្នាំ២០២៤។

លោកវេជ្ជបណ្ឌិត អ៊ុយ ចាន់ថុល ប្រធានក្រុមប្រឹក្សាគណៈគ្រូពេទ្យខេត្តសៀមរាប បានឲ្យដឹងថា ការរៀបចំទិវាវេជ្ជសាស្ត្រនេះ ជាការធ្វើឲ្យប្រសើរឡើងនូវចំណេះជំនាញអ្នកប្រកបវិជ្ជាជីវៈសុខាភិបាល។ជាមួយគ្នានេះ ចូលរួមទិវាអភិវឌ្ឍន៍វិជ្ជាជីវៈវេជ្ជសាស្ត្របន្តក៏ដូចជាចូលរួមសិក្ខាសាលាវិជ្ជាជីវៈសុខាភិបាលផ្សេងៗក៏ដើម្បីបំពេញពិន្ទុសម្រាប់បន្តសុពលភាពផងដែរ។យោងតាមលោកវេជ្ជបណ្ឌិត ប្រធានគណៈគ្រូពេទ្យខេត្តសៀមរាប បានឲ្យដឹងថា នៅឆ្នាំ២០២៤នេះ ខេត្តសៀមរាប មានគ្រូពេទ្យ ចំនួន៦៣៥នាក់ បានចុះបញ្ជីការ ក្នុងនោះគ្រូពេទ្យបរទេសចំនួន១១១នាក់ ។ លោកបន្តថា ទោះជាយ៉ាងនេះក្តីក៏នៅមានគ្រូពេទ្យមួយចំនួនតូចបាននឹងកំពុងធ្វើការនៅក្នុងអង្គភាពសុខាភិបាលខ្លះ ដោយមិនមានការចុះបញ្ជីនិងគ្មានអាជ្ញាប័ណ្ណ ។ ចំពោះបញ្ហានេះ លោកប្រធានក្រុមប្រឹក្សាគណៈគ្រូពេទ្យខេត្តសៀមរាប បានជំរុញដល់ប្រធានអង្គភាពទាំងនោះ ជំរុញឬក៏តម្រូវឲ្យមានវិញ្ញាបនបត្រនិងអាជ្ញាប័ណ្ណមុននឹងអនុញ្ញាតឲ្យចូលបំរើការងារ។លោកក៏បានជំរុញដល់គ្រូពេទ្យទាំងអស់ត្រូវខិតខំបំពេញការងារឲ្យអស់ពីសមត្ថភាព និងគោរពនូវក្រមវិជ្ជាជីវៈឲ្យបានខ្ជាប់ខ្ជួន។

លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានលើកឡើងថា ក្នុងនាមជាគ្រូពេទ្យ ត្រូវខិតខំធ្វើយ៉ាងណាជួយព្យាបាលអ្នកជំងឺប្រកបដោយប្រសិទ្ធភាព និងស្មើភាព ព្រោះថាជាគ្រូពេទ្យជាអ្នកព្យាបាលអ្នកជំងឺដោយមិនគិតពីអ្វីផ្សេងពីនេះឡើយ។ លោកវេជ្ជបណ្ឌិតបន្តថា ការប្រកបរបរវិជ្ជាជីវៈសុខាភិបាលនេះ មានបញ្ហាប្រឈមច្រើនណាស់។ ដូច្នេះការគោរពបាននូវក្រមសីលធម៌វិជ្ជាជីវៈ នឹងជួយឲ្យគ្រូពេទ្យរួចផុតពីការប្រឈមទាំងនោះ និងជួយឲ្យគ្រូពេទ្យទទួលបាននូវគោរពប្រកបដោយកិត្តិយស និងសេចក្តីថ្នៃថ្នូរ៕លោកវេជ្ជបណ្ឌិត លើកឡើងថា ដើម្បីក្លាយជាគ្រូពេទ្យ ជាបញ្ញាវ័ន្តមួយរូប ដែលទទួល ស្គាល់ពីស្ថាប័នជាតិ ការជឿទុកចិត្តពីសំណាក់ប្រជាជន គ្រូពេទ្យត្រូវគោរពនូវក្រមសីលធម៌វិជ្ជាជីវៈ និងច្បាប់ស្តីពីការគ្រប់គ្រងអ្នកប្រកបវិជ្ជាជីវៈ ជាវិជ្ជមានឲ្យបានល្អ ព្រោះមនុស្សគ្រប់រូប ពេលឈើនឹកឃើញពេទ្យ ហើយតែងគិតថា ពេទ្យគឺជាព្រះឬទេវតា ដែលអាចជួយគាត់បាន ប៉ុន្តែគ្រូពេទ្យក៏ត្រូវការយន្តស័ក្តសិទ្ធសម្រាប់ការពារខ្លួន ដែលត្រូវចុះបញ្ជីគណៈគ្រូពេទ្យឲ្យបានគ្រប់ៗគ្នា ខណៈដែលក្រុមប្រឹក្សាគណៈគ្រូពេទ្យខេបានដើរតួនាទីយ៉ាងសំខាន់ក្នុង ការត្រួតពិនិត្យអំពីគុណវុឌ្ឍន៍ និងសម្បទាគ្រូពេទ្យ ក្នុងការដោះស្រាយបញ្ហាផ្សេងៗ រវាងគ្រូពេទ្យជាមួយអ្នកជំងឺ គ្រូពេទ្យ និងគ្រូពេទ្យជាដើម៕