ឯកឧត្តម វង សូត អនុប្រធានទី២រដ្ឋសភា បានជួបសំណេះសំណាល និងពិភាក្សាការងារជាមួយ ឯកឧត្តម ជី ពីងស៊ាន (Ji Bingxuan) អនុប្រធានគណៈកម្មាធិការអចិន្ត្រៃយ៍សភាប្រជាជន អាណត្តិ​ទី១៣ និងជាប្រធានសមាគមន៍ចិនសម្រាប់ការយល់ដឹងជាអន្តរជាតិ (CAFIU) នៅល្ងាច​ថ្ងៃ​ទី២៧ ខែតុលា ឆ្នាំ២០២៤។

ឯកឧត្តម ជី ពីងស៊ាន បានសួរសុខទុក្ខគណៈប្រតិភូរដ្ឋសភាកម្ពុជា បន្ទាប់ពីបាន​មក​ដល់​ប្រទេស​ចិន​រយៈ​ពេល២ថ្ងៃមកនេះ។ ឯកឧត្តម ក៏បានរៀបរាប់ជូនគណៈប្រតិភូ អំពីភូមិសាស្រ្ត និង​ស្ថានភាព​នៃ​ការអភិវឌ្ឍខេត្តហ្វូជានផងដែរ។ ឯកឧត្តម បានរំលឹកថា ចំនុចពិសេសនៃតំបន់ភ្នំ Wuyi ស្ថិតក្នុងស្រុកណានពីង ខេត្តហ្វូជាន ដែលគណៈប្រតិភូកំពុងស្នាក់នៅនេះ គឺជា​ចំនុច​ចាប់​ផ្តើម​នៃ​ផែនការបដិវត្តន៍របស់បក្សកុម្មុយនិស្តចិនដែលដឹកនាំដោយ លោកប្រធាន ម៉ៅ សេទុង។

ខេត្តហ្វូជាន ជាខេត្តដ៏សំខាន់មួយរបស់ប្រទេសចិន មានរួមបញ្ចូលទាំងតំបន់ភ្នំ និងឆ្នេរសមុទ្រ ដែល​មានអំណោយផលដល់សេដ្ឋកិច្ច។ តំបន់​មាត់​សមុទ្រ​មាន​អំណោយ​ផល​ដល់​វិស័យ​ដឹក​ជញ្ជូន​តាម​កំពង់ផែរសមុទ្រ និងតំបន់ភ្នំមានអំណោយផលផ្នែកទេសចរណ៍ និងការដាំតែជាដើម។ ក្នុង​នោះក្រុង(ស្រុក) Xiamen គឺជាក្រុងដ៏សំខាន់មួយ ដែលជាបណ្តុំសេដ្ឋកិច្ច មាន​កំពង់​ផែរ​ដ៏​ធំ​១ ក្នុងចំណោមកំពុងផែរធំៗ៥ ដែលចិនបានបើចំហរមុនគេបង្អស់ និងជា​តំបន់​ទេសចរណ៍​សំខាន់​ថែម​ទៀតផង។

ឯកឧត្តម វង សូត អនុប្រធានទី២រដ្ឋសភា បានអរគុណចំពោះការៀបរាប់យ៉ាងក្បោះក្បាយ អំពី​សក្តានុពលនៃខេត្តហ្វូជាន និងបាន​កោត​សរសើរ​ចំពោះ​ការ​រៀបចំ​អភិវឌ្ឍ​ខេត្ត​នេះ​បាន​យ៉ាង​ស្រស់​ស្អាត​។ ឯកឧត្តម មានប្រសាសន៍បន្តថា ខេត្តហ្វូជាន និងកម្ពុជា ក៏មានទំនាក់​ទំនង​ជា​មួ​យ​គ្នា​ជា​ប្រវត្តិ​សាស្រ្ត​ផងដែរ។ សព្វថ្ងៃប្រជាជនកម្ពុជា ខ្សែស្រឡាយចិនហ្វូជានជាច្រើនកំពុងរស់នៅកម្ពុជា ហើយ​បានបង្កើតជាសមាគមន៍ចិនហ្វូជាន ដែលដើរ​តួនាទី​យ៉ាង​សំខាន់​ក្នុង​ការ​ទាក់​ទាញ​អ្នក​ទេសចរ និងអ្នកវិនិយោគចិន ទៅកាន់កម្ពុជា។

ឯកឧត្តមអនុប្រធានទី២រដ្ឋសភា បង្ហាញក្តីសង្ឃឹមថាទំនាក់ទំនងកម្ពុជា-ចិន ទាំង​ក្រប​ខណ្ឌ​នីតិ​ប្រតិបត្តិ និងនីតិប្បញ្ញត្តិ នឹងបន្តកាន់តែស្អិតរមួតជាមួយគ្នា និងបានសំណូមពរដល់ ឯកឧត្តម ជី ពីង​ស៊ាន ជួយជំរុញប្រជាជន និងអ្នកវិនិយោគចិន ទៅទស្សនាកំសាន្ត និង​វិនិយោគ​នៅ​កម្ពុជា​កាត់​តែ​ច្រើន​បន្ថែមទៀត។

ឯកឧត្តម ជី ពីងស៊ាន បានទទួលយកសំណើររបស់ឯកឧត្តម វង សូត ដោយសន្យាថា​នឹង​ជំរុញ​ឱ្យ​ប្រជាជន​ខេត្ត​ហ្វូជាន ទៅធ្វើទេសចរកំសាន្តនៅកម្ពុជា និងជំរុញក្រុមហ៊ុនបច្ចេកវិទ្យាកម្រិតខ្ពស់ ឱ្យ​ទៅ​វិនិយោគនៅកម្ពុជាបន្ថែមទៀត។ ឯកឧត្តម គូសបញ្ជាក់ថា កម្ពុជាគឺជាមិត្ត​ល្អរ​បស់​ចិន​នៅ​គ្រប់​កាលៈទេសៈ។ ទោះពិភពលោកប្រែប្រួលកាន់តែស្មុគស្មាញយ៉ាងណាក៏ដោយ ប៉ុន្តែ​មិត្តភាព​កម្ពុជា-ចិន នៅតែមិនអាចបំបែកពីគ្នាបានឡើយ។ ដូចនេះ រដ្ឋាភិបាលចិន យកចិត្តទុកដាក់ខ្ពស់ និង​គាំទ្រកម្ពុជាទទួលបានការរីកចម្រើនកាន់តែល្អប្រសើរឡើងថែមទៀត៕