យោងតាមការស្ទង់មតិថ្មីមួយបានឱ្យដឹងថា អ្នកបោះឆ្នោតអាមេរិកភាគច្រើនជឿថា លោក Donald Trump នឹងមិនទទួលយកលទ្ធផលបោះឆ្នោតប្រធានាធិបតីឆ្នាំ ២០២៤នេះទេ ប្រសិនបើលោកចាញ់លោកស្រី Kamala Harris ។

ការស្ទង់មតិរបស់ទូរទស្សន៍ CNN ធ្វើឡើងដោយសេវាកម្ម SSRS បានរកឃើញថា ប្រសិនបើអតីតប្រធានាធិបតីចាញ់នៅសប្តាហ៍ក្រោយ មានតែ៣០ ភាគរយនៃអ្នកបោះឆ្នោតដែលបានចុះឈ្មោះទាំងអស់ជឿថាលោកនឹងទទួលយកលទ្ធផលនេះ ហើយទទួលស្គាល់គូប្រជែងរបស់ខ្លួន។

ផ្ទុយទៅវិញ៧៣ភាគរយជឿថាលោកស្រី Harris នឹងទទួលយកលទ្ធផលបោះឆ្នោតប្រសិនបើលោកស្រីចាញ់។

ការស្ទង់មតិបានរកឃើញថា ៩៥ ភាគរយនៃអ្នកគាំទ្រលោកស្រី Harris មិនជឿថាលោក Trump នឹងយល់ព្រមទេ ប្រសិនបើរូបលោកចាញ់។ ទោះជាយ៉ាងណាក៏ដោយ ភាគច្រើនជាង៥៧ ភាគរយនៃក្រុមអ្នកគាំទ្រលោក Trump ជឿថាលោកនឹងទទួលស្គាល់ និងទទួលយកលទ្ធផលប្រសិនបើលោកចាញ់។

ការស្ទង់មតិក៏បានរកឃើញផងដែរថា អ្នកបោះឆ្នោតអាមេរិកភាគច្រើនគាំទ្រគោលការណ៍ដែលបេក្ខជនមានកាតព្វកិច្ចទទួលយកលទ្ធផលបោះឆ្នោត។ ការស្ទង់មតិបានរកឃើញថា ៨៨ ភាគរយបាននិយាយថាបេក្ខជនដែលចាញ់ត្រូវមានកាតព្វកិច្ចទទួលស្គាល់នៅពេលដែលលទ្ធផលត្រូវបានបញ្ជាក់នៅគ្រប់រដ្ឋ បើធៀបនឹង ១២ ភាគរយដែលនិយាយថាពួកគេមិនយល់ស្រប៕