ក្រសួងការបរទេសអាមេរិក បានព្រមានកាលពីថ្ងៃចន្ទថា ជំនួយមនុស្សធម៌ មិនបានធ្លាក់ដល់មនុស្ស ដែលត្រូវការវា នៅក្នុងទីក្រុងJabalia ភាគខាងជើងតំបន់ហ្កាហ្សា ដែលអ្នកនាំពាក្យលោក Matthew Miller បាននិយាយថា សហរដ្ឋអាមេរិក មិនអាចទទួលយកទង្វើបែបនេះទេ។

លោក Miller បាននិយាយថា៖«នោះគឺជាការវាយតម្លៃរបស់យើងមួយ គឺថាអាហារ ទឹក និងថ្នាំដែលត្រូវ ទៅដល់ប្រជាជននៅក្នុងទីក្រុងJabalia នៅពេលនេះ ពួកគេមិនទាន់ទទួលបានវាទេ ហើយយើងចង់ឃើញបញ្ហានោះ មានការផ្លាស់ប្តូរ។

សេវាសង្គ្រោះបន្ទាន់ស៊ីវិលប៉ាឡេស្ទីន បាននិយាយថា មនុស្សប្រហែល ១០០.000នាក់ បានជាប់ខ្លួន នៅក្នុងទីក្រុង Jabalia, Beit Lahiya និង Beit Hanoun ដោយគ្មានការផ្គត់ផ្គង់ថ្នាំពេទ្យ ឬស្បៀងអាហារអ្វីឡើយ។ សារព័ត៌មានរ៉យទ័រ មិនអាចផ្ទៀងផ្ទាត់ចំនួននេះ ដោយឯករាជ្យបានទេ។

សេវាសង្គ្រោះបន្ទាន់ បានបន្តថា ប្រតិបត្តិការរបស់ខ្លួន បានបញ្ឈប់ ដោយសារតែការវាយលុករបស់អ៊ីស្រាអែលរយៈពេល ៣សប្តាហ៍ ទៅកាន់ភាគខាងជើង ជាតំបន់មួយដែលយោធា បាននិយាយថា ខ្លួនបានកម្ចាត់កងកម្លាំងប្រយុទ្ធរបស់ក្រុមហាម៉ាសពីដំបូង ក្នុងសង្រ្គាមរយៈពេលមួយឆ្នាំនេះ។

កងកម្លាំងអ៊ីស្រាអែល បានចាប់ផ្តើមប្រតិបត្តិការនាពេលថ្មីៗនេះ នៅភាគខាងជើង ជាមួយនឹងគោលបំណងដែលបានប្រកាសថា រារាំងក្រុមហាម៉ាសមិនឲ្យប្រមូលផ្តុំគ្នាឡើងវិញ។ ប្រតិបត្តិការនេះ កាន់តែខ្លាំងឡើង ចាប់តាំងពីការសម្លាប់មេដឹកនាំក្រុមហាម៉ាស លោក យ៉ាយ៉ា ស៊ីនវ៉ា (Yahya Sinwar) ជាងមួយសប្តាហ៍កន្លងទៅ។