​មី​យ៉ាន់​ម៉ា​៖ អ្នកនាំពាក្យ​របប​សឹក​មី​យ៉ាន់​ម៉ា​បាន​និយាយ​ថា យោធា​សហភាព​មី​យ៉ាន់​ម៉ា​មិនបាន​រារាំង​បេសកជន​ពិសេស​អាស៊ីអាគ្នេយ៍ មិន​ឱ្យ​មក​ទស្សនកិច្ច​ប្រទេស​នេះ​ទេ ប៉ុន្តែ​នឹង​មិន​អនុញ្ញាត​ឱ្យ​ជួប​អតីត​មេដឹកនាំ​លោកស្រី Aung San Suu Kyi ឡើយ ព្រោះ​លោកស្រី​ត្រូវ​បាន​ចោទប្រកាន់​ពី​បទ​ឧក្រិដ្ឋ​។

​អ្នកនាំពាក្យ​លោក Zaw Min Tun បាន​បន្ថែម​ថា ​ការ​ពន្យារពេល​របស់​អង្គការសហប្រជាជាតិ​ក្នុង​ការ​អនុម័ត​ការតែងតាំង ​ឯកអគ្គរដ្ឋទូត​របស់​រដ្ឋាភិបាល​យោធា​ប្រចាំ​នៅ​អង្គការសហប្រជាជាតិ​គឺជា​ហេតុផល​នយោបាយ ដោយ​និយាយ​ថា​ អង្គការសហប្រជាជាតិ និង​បណ្តា​ប្រទេស​ និង​អង្គការ​ដទៃ​ទៀត​គួរតែ​ចៀសវាង​ស្តង់ដារ​ពីរ នៅ​ពេល​ដែល​ពួកគេ​ចូលរួម​ក្នុង​កិច្ចការ​អន្តរជាតិ​។ សុន្ទរកថា​របស់​អ្នកនាំពាក្យ​ដែល​ចេញ​ដោយ​យោធា​នៅ​ក្នុង​សេចក្តី​សង្ខេប​មួយ​កាលពី​ថ្ងៃ​ពុធ​ ទី​១៣ ខែ​តុលា​មាន​ឡើង ខណៈ​សម្ពាធ​អន្តរជាតិ​កាន់តែ​កើន​ឡើង​ទៅ​លើ​របប​យោធា ដើម្បី​ឲ្យ​អនុវត្ត​ផែន​ការ​សន្តិភាព ៥​ចំណុចដែល​ឧ​ត្ត​ម​សេនីយ៍​ជាន់ខ្ពស់​របស់​ខ្លួន​គឺ​លោក Min Aung Hlaing បាន​ព្រម​ព្រៀង​ជាមួយ​អាស៊ាន​កាលពី​ខែ​មេសា​កន្លងទៅ​។​

​សហភាព​មី​យ៉ាន់​ម៉ា​បាន​ធ្លាក់​ចូល​ក្នុង​វិបត្តិ​នយោបាយ និង​សេដ្ឋកិច្ច​ចាប់​តាំង​ពី​រដ្ឋប្រហារ​យោធា​ថ្ងៃ​ទី​១ ខែ​កុម្ភៈ ដែល​បង្ក​ឱ្យ​មាន​ការ​ផ្ទុះ​កំហឹង និង​ការ​តវ៉ា​ដែល​មិន​ថមថយ​នៅឡើយ ដោយ​ជន​ស៊ីវិល​មួយ​ចំនួន​រួមគ្នា​បង្កើត​ជា​ក្រុម​កងជីវពល​ ដើម្បី​ដណ្ដើម​អំណាច​ពី​កងទ័ព​មកវិញ​។​ យោង​តាម​ប្រភព​ដែល​ស្និទ្ធ​នឹង​កិច្ចប្រជុំ​នេះ​បាន​ឲ្យ​ដឹង​ថា រដ្ឋមន្ត្រីការបរទេស​របស់​សមាគម​ប្រជាជាតិ​អាស៊ីអាគ្នេយ៍ ឬ​ហៅ​កាត់​ថា អាស៊ាន ​នឹង​បើក​កិច្ចប្រជុំ​គ្នា​នៅ​ថ្ងៃ​សុក្រ​ ទី១៥ ខែ​តុលា​ស្អែក​នេះ ដើម្បី​ពិភាក្សា​អំពី​កិច្ចប្រជុំ​មេដឹកនាំ​តំបន់​ដែល​ជិត​ចូល​មក​ដល់ ក្នុង​អំឡុង​ពេល​ដែល​កិច្ចប្រជុំ​នេះលោក Min Aung Hlaing ប្រមុខ​ដឹកនាំ​របប​សឹក​សហភាព​មី​យ៉ាន់​ម៉ា ​ដែល​អាច​មិន​ឲ្យ​ចូលរួម​នឹង​ត្រូវ​បាន​លើក​យក​មក​ពិភាក្សា​៕​

អត្ថបទ៖ សុខមាន