មេដឹកនាំនៃតំបន់ វ៉ាលេនសៀ (Valencia) បានប្រាប់អ្នកយកព័ត៌មាននៅព្រឹកថ្ងៃពុធ (៣០ តុលា) នេះថា សាកសពជាច្រើនក្នុងចំនួនមិនជាក់លាក់ ត្រូវបានគេរកឃើញនៅក្នុងតំបន់ដែលរងគ្រោះដោយទឹកជំនន់ដ៏គំហុកនៅភាគអាគ្នេយ៍នៃប្រទេសអេស្ប៉ាញ។

ភ្លៀងធ្លាក់ខ្លាំង ដែលបង្កឡើងដោយរលកត្រជាក់ដែលធ្វើដំណើរឆ្លងកាត់ភាគអាគ្នេយ៍នៃប្រទេសអេស្ប៉ាញ បានជន់លិចផ្លូវ និងទីប្រជុំជនកាលពីថ្ងៃអង្គារ ដែលជំរុញឱ្យអាជ្ញាធរនៅក្នុងតំបន់រងគ្រោះខ្លាំងបំផុត ចេញការណែនាំដល់ពលរដ្ឋឱ្យស្នាក់នៅផ្ទះសម្បែង និងជៀសវាងការធ្វើដំណើរដែលមិនសំខាន់ទាំងអស់។

មេដឹកនាំប្រចាំតំបន់ Valencia លោក ខាឡូស ម៉ាហ្សន (Carlos Mazon) បាននិយាយថា "សាកសពមួយចំនួនត្រូវបានរកឃើញ ប៉ុន្តែដោយការគោរពចំពោះក្រុមគ្រួសារសព យើងនឹងមិនផ្តល់ទិន្នន័យបន្ថែមទៀតទេ"។ ទីភ្នាក់ងារអាកាសធាតុរដ្ឋរបស់អេស្ប៉ាញ AEMET បានប្រកាសអាសន្នពណ៌ក្រហមនៅតំបន់ Valencia ភាគខាងកើត ដោយតំបន់មួយចំនួនដូចជា ទូរីស (Turis) និង អ៊ូទាល (Utiel) កត់ត្រាទឹកភ្លៀងកម្រិត ២០០មីលីម៉ែត្រ (៧,៩ អ៊ីញ)។

ស្ថានីយ៍វិទ្យុ និងទូរទស្សន៍បានទទួលការហៅទូរសព្ទសុំជំនួយរាប់រយដងពីប្រជាពលរដ្ឋដែលជាប់នៅក្នុងតំបន់ទឹកជំនន់ ឬស្វែងរកសាច់ញាតិរបស់ពួកគេ ដោយសារសេវាសង្គ្រោះបន្ទាន់មិនអាចទៅដល់គ្រប់ទីតាំងដែលរងផលប៉ះពាល់៕