ពិធីប្រណាំងទូកអុំ ទូកចែវនៅមាត់កំពង់ទឹកសួនច្បារជំទាវស្រែនសន្តិភាព ស្រុកកំពង់លែង និង​ពិធី​ប្រគំតន្ត្រី ដែលរៀបចំឡើងដោយរដ្ឋបាលស្រុកកំពង់លែង រយៈពេល៦ថ្ងៃចាប់ពីថ្ងៃទី២៤ ដល់២៩ ខែតុលា ឆ្នាំ២០២៤ បានប្រព្រឹត្តិទៅដោយរលូន និងសប្បាយរីករាយ ក្រោមម្លប់សុខសន្តិភាពនៅក្នុងប្រទេសទាំងមូល ដែលមានប្រជាពលរដ្ឋគ្រប់ទីកន្លែងមកចូលរួមកំសាន្តប្រមាណជាង១ម៉ឺននាក់ ។

លោក យ៉ែម លក្ខិណា អភិបាលស្រុកកំពង់លែង បានថ្លែងថា៖ កម្មវិធីប្រណាំងទូកក្នុងពេលនេះ គឺបានបង្កភាពរីករាយដល់ប្រជាពលរដ្ឋ ស្ថិតក្រោមម្លប់សន្តិភាព ទើបយើងមានការជួបជុំគ្នាក្នុងពិធីបុណ្យអុំទូកនេះ។ ពិធីនេះ បានបង្ហាញពីការសាមគ្គីភាពគ្នា រវាងក្រុមកីឡាករជាប្រជាពលរដ្ឋយើង ក៏ដូចជារួមគ្នាអភិវឌ្ឍស្រុកខេត្ត ប្រទេសជាតិ លើគ្រប់វិស័យក្រោមម្លប់សុខសន្តិភាព។ លោកបន្តថា បើគ្មានសន្តិភាពយើងពិតជាគ្មានឱកាសជួបជុំគ្នាដូចពេលនេះទេ ដែលនេះ គឺជាគុណបំណាច់ដ៏ធំធេងរបស់សម្ដេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្ត្រី រួមនិងថ្នាក់ដឹកនាំផ្សេងទៀត ដែលផ្តល់សុខសន្តិភាព និងការអភិវឌ្ឍន៍លើគ្រប់វិស័យ ដើម្បីភាពសុខសាន្តរបស់ប្រជាពលរដ្ឋ ។

ឯកឧត្តម ឡុច វណ្ណារ៉ា ក្រុមប្រឹក្សាខេត្តកំពង់ឆ្នាំងបានអោយដឹងថា៖ ពិធីអុំទូក និងការប្រគំតន្ត្រីកំសាន្តផ្សេងៗ ដែលរដ្ឋបាលស្រុកកំពង់លែងនឹងប្រារព្ធនាពេលនេះ គឺជាព្រឹត្តិការណ៍មួយដែលបង្កលក្ខណៈសប្បាយៗដល់ប្រជាពលរដ្ឋទាំងនៅក្នុងស្រុក ក៏ដូចជាក្នុងខេត្ត បានអញ្ជើញមកចូលរួមកំសាន្ត។ ពិធីនេះគឺមានសារៈសំខាន់៣យ៉ាង គឺផ្ដល់ភាពសប្បាយរីករាយដល់ប្រជាពលរដ្ឋ និងភ្ញៀវទេសចរក្នុងស្រុកខេត្តបានដើរលេងកម្សាន្ត, បានផ្សព្វផ្សាយអំពីសក្តានុពល នៃភាពរីកចម្រើនរបស់ស្រុកកំពង់លែងដល់ភ្ញៀវទេសចរដែលបានមកលេង ជាពិសេសទៀតនោះ ជាការផ្សព្វផ្សាយដល់ភ្ញៀវជាតិ និងភ្ញៀវអន្តរជាតិ ឲ្យបានឃើញថា ប្រទេសកម្ពុជាបច្ចុប្បន្ន កំពុងមានសុខសន្តិភាព សេរីភាពគ្រប់បែបយ៉ាង ក្រោមម្លប់សន្តិភាព និងមិនមានជម្ងឺកូវីដ១៩ឆ្លងរាលដាលទៀតនោះឡើយ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា៕ កាំង ហុងវាស្នា