រដ្ឋាភិបាលកាណាដា កាលពីថ្ងៃអង្គារ (ទី២៩ ខែតុលា) បានចោទប្រកាន់ថា រដ្ឋមន្ត្រីក្រសួងមហាផ្ទៃឥណ្ឌា លោក Amit Shah ដែលជាសម្ព័ន្ធមិត្តជិតស្និទ្ធរបស់នាយករដ្ឋមន្ត្រីជាតិនិយមហិណ្ឌូ លោក Narendra Modi ជាអ្នកនៅពីក្រោយគម្រោងការកំណត់គោលដៅលើក្រុមអ្នកបំបែកខ្លួនសាសានា Sikh នៅលើដែនដីកាណាដា។

គួរបញ្ជាក់ថា រដ្ឋាភិបាលឥណ្ឌាបានច្រានចោលការចោទប្រកាន់ពីមុនរបស់កាណាដាថា គ្មានមូលដ្ឋានច្បាស់លាស់ ដោយបដិសេធពីការជាប់ពាក់ព័ន្ធណាមួយនឹងករណីនេះ។

សារព័ត៌មាន Washington Post បានរាយការណ៍ដំបូងគេថា មន្ត្រីកាណាដាបានចោទប្រកាន់លោក Shah ថា ជាអ្នកនៅពីក្រោយយុទ្ធនាការនៃអំពើហិង្សា និងការបំភិតបំភ័យ ដែលផ្តោតលើអ្នកបំបែកខ្លួនសាសនា Sikh នៅក្នុងប្រទេសកាណាដា។

អនុរដ្ឋមន្ត្រីក្រសួងការបរទេសកាណាដា លោក David Morrison បានប្រាប់ទៅកាន់ក្រុមសមាជិកសភាកាលពីថ្ងៃអង្គារថា លោកបានប្រាប់សារព័ត៌មានដែលមានមូលដ្ឋាននៅសហរដ្ឋអាមេរិកថា លោក Shah ជាអ្នកនៅពីក្រោយគម្រោងការនេះ។

លោក Morrison បានប្រាប់គណៈកម្មាធិការ ដោយមិនបានផ្តល់ព័ត៌មានលម្អិត ឬភស្តុតាងបន្ថែមថា «អ្នកសារព័ត៌មានបានទូរសព្ទមកខ្ញុំ ហើយសួរថា តើជននោះ (លោក Shah) គឺជាមនុស្សនោះ ឬអត់។ ខ្ញុំបានអះអាងថា គាត់គឺជននោះ»។ គណៈកម្មការជាន់ខ្ពស់ឥណ្ឌា ប្រចាំនៅទីក្រុងអូតាវ៉ា និងក្រសួងការបរទេសឥណ្ឌា មិនមានការអត្ថាធិប្បាយភ្លាមៗនោះឡើយ ជុំវិញការលើកឡើងនេះ។

សូមបញ្ជាក់បន្ថែមថា ប្រទេសកាណាដានៅពាក់កណ្តាលខែតុលា បានបណ្តេញអ្នកការទូតឥណ្ឌា ដោយភ្ជាប់អ្នកទាំងនោះទៅនឹងឃាតកម្មឆ្នាំ២០២៣ លើមេដឹកនាំផ្តាច់ខ្លួនសាសនា Sikh លោក Hardeep Singh Nijjar នៅលើដែនដីកាណាដា។ ហើយឥណ្ឌាក៏បានបញ្ជាឲ្យបណ្ដេញអ្នកការទូតកាណាដាចេញពីប្រទេសដូចគ្នាដែរ៕