ភ្នំពេញ៖ អគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិកម្ពុជា បានធ្វើជាម្ចាស់ផ្ទះរៀបចំសិក្ខាសាលាបណ្តាញវិទ្យាស្ថានការពារជាតិ និងសន្តិសុខអាស៊ាន ដែលហៅកាត់ថាNADI ក្រោមមូលបទ «គុណតម្លៃ និងតួនាទីនៃប្រវត្តិសាស្ត្រយោធាក្នុងការពង្រឹង និងថែរក្សាសន្តិភាព សន្តិសុខ និងកិច្ចសហប្រតិបត្តិការជាក់ស្តែងក្នុងតំបន់» បានពិភាក្សាគ្នាជាច្រើនលើប្រវត្តិសាស្រ្តកងទ័ព និងការផ្សះផ្សារបស់កងទ័ពដើម្បីសុខសន្តិភាព។

កិច្ចប្រជុំដែលបានប្រព្រឹត្តិឡើងរយៈពេល ២ថ្ងៃ គឺចាប់ពីថ្ងៃទី១២-១៣ ខែតុលា ឆ្នាំ២០២១ តាមរយៈប្រព័ន្ធ Videoconference ដែលដឹកនាំដោយអ្នកស្រី ឧត្តមសេនីយ៍ឯក ណឹម សុវត្ថី អគ្គនាយករង អគ្គនាយកដ្ឋាននយោបាយ និងកិច្ចការបរទេសក្រសួងការពារជាតិកម្ពុជា។

​នៅក្នុងកិច្ចប្រជុំភាគីដែលចូលរួមបានលើកអំពីវត្ថុបំណងសំខាន់ៗជាច្រើន ដើម្បីគុណប្រយោជន៍ របស់កងទ័ពដូចជា៖ ដើម្បីចែករំលែកនូវការអនុវត្តល្អៗ និងមេរៀនដែលបានសិក្សាទាក់ទងនឹងការចូលរួមកន្លងមករបស់កម្លាំងការពារជាតិក្នុងការដោះស្រាយទំនាស់និងការផ្សះផ្សាសន្តិភាពនៅក្នុងតំបន់អាស៊ាន។

ដើម្បីលើកកម្ពស់ការស្រាវជ្រាវ និងការសន្ទនាបើកចំហក្នុងចំណោមប្រទេសជាសមាជិក NADI ដោយផ្អែកលើចំណេះដឹង និងបទពិសោធន៍អំពីការរួមចំណែកជាប្រវត្តិសាស្ត្រនៃការបង្កើតការការពារជាតិក្នុងអាស៊ាននីមួយៗចំពោះការគ្រប់គ្រងនិងការដោះស្រាយជម្លោះ និងការស្តារសន្តិភាពនិងសន្តិសុខផ្ទៃក្នុងឡើងវិញ។ និងដើម្បីស្វែងរកវិធីសាស្រ្តប្រកបដោយភាពច្នៃប្រឌិតក្នុងការបង្កើតកិច្ចសហប្រតិបត្តិការការពារជាតិដែលមានសក្តានុពលដោយផ្អែកលើប្រវត្តិយោធារបស់រដ្ឋជាសមាជិកនីមួយៗ ក្នុងទិសដៅពង្រឹងសន្តិភាពនិង សន្តិសុខនៅក្នុងតំបន់បន្ថែមទៀតជាដើម។

ជាមួយគ្នានោះ សិក្ខាសាលាក៏មានការចូលរួមធ្វើបទបង្ហាញ និងកិច្ចពិភាក្សាជាច្រើនពីបណ្តាស្ថាប័នការពារជាតិ និងសន្តិសុខ នៃបណ្តាប្រទេសជាសមាជិកអាស៊ាន លើប្រធានបទសំខាន់ៗផ្សេងទៀតផងដែរ ដូចជា តួនាទីនៃប្រវត្តិសាស្ត្រយោធា និងសារៈសំខាន់របស់ប្រវត្តិសាស្រ្តយោធាក្នុងការលើកកម្ពស់សន្តិភាព និងសន្តិសុខក្នុងតំបន់។ ការស្វែងរកវិធីសាស្រ្តថ្មីៗ និងប្រកបដោយភាពច្នៃប្រឌិតឆ្ពោះទៅរកការពង្រឹងកិច្ចសហប្រតិបត្តិការ តាមរយៈការសិក្សាប្រវត្តិយោធា។ និងការពឹងផ្អែកទៅលើប្រវត្តិសាស្រ្តយោធា ដើម្បីពង្រឹងកិច្ចសហប្រតិបត្តិការ និងទំនុកចិត្តក្នុងចំណោមស្ថាប័នការពារជាតិអាស៊ានជាដើមនោះ៕ អត្ថបទ៖ បាន ចក់​