បុគ្គលិកក្រុមហ៊ុនរថយន្តអាល្លឺម៉ង់ រាប់ពាន់នាក់ បានចាប់ផ្តើមធ្វើកូដកម្មទូទាំងប្រទេសដើម្បីទាមទារប្រាក់ឈ្នួលខ្ពស់ជាងមុនកាលពីថ្ងៃអង្គារ (២៩ តុលា) ដោយបានបង្កបញ្ហាដល់បណ្ដាក្រុមហ៊ុនដែលកំពុងបារម្ភពីការទប់ទល់នឹងការប្រកួតប្រជែងជាសកល ដោយសារការចំណាយខ្ពស់ ការនាំចេញទន់ខ្សោយ និងគូប្រជែងបរទេសកំពុងមានប្រៀប។

កូដកម្មដោយបុគ្គលិកសហជីពមួយចំនួននៅក្នុងវិស័យវិស្វកម្មអគ្គិសនី និងលោហៈដែលមានសរុបជិត ៤លាននាក់នេះ បានប៉ះពាល់ដល់ក្រុមហ៊ុនដូចជា Porsche AG, BMW និង Mercedes ជាដើម។

ជាមួយគ្នានេះ ក្រុមហ៊ុនរថយន្តខ្នាតយក្ស Volkswagen អាចប្រកាសពីផែនការបិទរោងចក្រចំនួន៣ ក្នុងសប្តាហ៍នេះ លើទឹកដីកំណើតអាល្លឺម៉ង់ ជាលើកដំបូងក្នុងប្រវត្តិសាស្ត្រ ៨៧ឆ្នាំរបស់ខ្លួន ក៏ដូចជាការបញ្ឈប់ការងារយ៉ាងច្រើន និងកាត់បន្ថយប្រាក់ឈ្នួល ១០% សម្រាប់កម្មករ។

ចក្ខុវិស័យធុរកិច្ចកាន់តែអាក្រក់នៅក្នុងសេដ្ឋកិច្ចដ៏ធំបំផុតរបស់អឺរ៉ុបមួយនេះ បានដាក់សម្ពាធលើរដ្ឋាភិបាលចម្រុះរបស់លោកអធិការបតី អូឡា សូស (Olaf Scholz) ដែលអាចឈានដល់ការដួលរលំមុនការបោះឆ្នោតសហព័ន្ធនៅឆ្នាំក្រោយ ខណៈការបង្ក្រាបគោលនយោបាយកាន់តែទូលំទូលាយ៕