កោះតៃវ៉ាន់ ចេញការព្រមាននៅថ្ងៃពុធ (៣០ តុលា) នេះ ក្នុងការត្រៀមខ្លួនទប់ទល់ព្យុះទីហ្វុងកម្លាំងខ្លាំង កង្រី (Kong-rey) ដែលរំពឹងថានឹងបោកបក់ដល់ដីនៅថ្ងៃព្រហស្បតិ៍ (៣១ តុលា) ស្អែកនេះតាមបណ្តោយឆ្នេរសមុទ្រភាគខាងកើតដែលមានប្រជាជនរស់នៅតិច ដោយព្យុះនឹងនាំមកនូវភ្លៀង និងខ្យល់បក់ខ្លាំងក្លាពាសពេញកោះ។

យោងតាមទីភ្នាក់ងារហានិភ័យព្យុះត្រូពិក TSR បានឱ្យដឹងថា ដោយមានកម្លាំងខ្យល់បក់ខ្លាំងជាង ២៣០គីឡូម៉ែត្រក្នុងមួយម៉ោង ព្យុះ Kong-rey បានពង្រឹងដល់កម្រិតស្មើនឹងព្យុះសង្ឃរាប្រភេទទី៤ ហើយត្រូវបានគេរំពឹងថានឹងកាន់តែខ្លាំងក្លាមុនពេលវាយប្រហារមកលើដីគោកក្នុងតំបន់ ថៃថុង (Taitung)។

រដ្ឋបាលអាកាសធាតុកណ្តាលរបស់តៃវ៉ាន់បាននិយាយថា៖ បន្ទាប់មកព្យុះនេះត្រូវបានគេព្យាករថានឹងឆ្លងកាត់ភាគខាងត្បូងកោះតៃវ៉ាន់ ចូលទៅក្នុងច្រកសមុទ្រ ហើយឆ្ពោះទៅកាន់ប្រទេសចិន។ យោងតាមរដ្ឋបាលបានឱ្យដឹងថា ភ្លៀងធ្លាក់រហូតដល់ ១,២ម៉ែត្រ ត្រូវបានគេរំពឹងថានឹងកើតមាននៅតំបន់ភ្នំភាគខាងកើតកោះ ហើយខ្យល់កន្រ្តាក់ទំនងជានឹងវាយប្រហារតំបន់ឆ្នេរនៅថ្ងៃព្រហស្បតិ៍។

មេដឹកនាំកោះតៃវ៉ាន់ លោក ឡៃ ឆឹងទ័រ (Lai Ching-te) បានជំរុញប្រជាជនឱ្យនៅឱ្យឆ្ងាយពីតំបន់ភ្នំ និងឆ្នេរសមុទ្រ។ តំបន់អនុត្រូពិក តៃវ៉ាន់ តែងតែរងការវាយប្រហារដោយព្យុះទីហ្វុង។ ព្យុះទីហ្វុង ក្រាថ្សន (Krathon) ចុងក្រោយបានសម្លាប់មនុស្ស ៤នាក់ នៅកោះតៃវ៉ាន់ កាលពីដើមខែនេះ៕