បេសកជនពិសេសរបស់អង្គការសហប្រជាជាតិ (UN) ប្រចាំសហភាពមីយ៉ាន់ម៉ា បានព្រមានថា ប្រទេសអាស៊ីអាគ្នេយ៍នេះ កំពុងស្ថិតក្នុងវិបត្តិ ដោយជម្លោះកាន់តែរីកធំឡើងៗ បណ្តាញឧក្រិដ្ឋកម្ម «មិនអាចគ្រប់គ្រងបាន» ហើយការរងទុក្ខវេទនារបស់ប្រជាជនស្ថិតក្នុងកម្រិតធ្ងន់ធ្ងរទៅៗដែលមិនធ្លាប់មានពីមុនមក។

នៅក្នុងរបាយការណ៍ដំបូងរបស់លោកស្រី ចាប់តាំងពីត្រូវបានតែងតាំងដោយអគ្គលេខាធិការ លោក Antonio Guterres កាលពីខែមេសា លោកស្រី Julie Bishop បានប្រាប់គណៈកម្មាធិការសិទ្ធិមនុស្សរបស់មហាសន្និបាតអង្គការសហប្រជាជាតិកាលពីថ្ងៃអង្គារ (ទី២៩ ខែតុលា) ថា៖ «ក្រុមពាក់ព័ន្ធទាំងឡាយ នៅមីយ៉ាន់ម៉ា ត្រូវតែប្រឹងប្រែងធ្វើយ៉ាងណាឲ្យហួសពីចិត្តគំនិតយកឈ្នះយកចាញ់ នាពេលបច្ចុប្បន្ននេះ»។

គួររំលឹកថា កងទ័ពក្នុងប្រទេសមីយ៉ាន់ម៉ា បានទម្លាក់រដ្ឋាភិបាលជាប់ឆ្នោតរបស់លោកស្រី Aung San Suu Kyi នៅក្នុងខែកុម្ភៈ ឆ្នាំ២០២១ និងបានបង្ក្រាបការតវ៉ាអហិង្សាគ្រប់ទីកន្លែងដែលប្រឹងប្រែង ដើម្បីឲ្យមានការគ្រប់គ្រងតាមបែបប្រជាធិបតេយ្យឡើងវិញ រហូតបង្កើតបានជាជម្លោះ ដែលនាំទៅរកការកើនឡើងនូវអំពើហិង្សា និងវិបត្តិមនុស្សធម៌ដល់សព្វថ្ងៃនេះ។

ក្នុងឆ្នាំកន្លងទៅ កងជីវពលប្រដាប់អាវុធជនជាតិភាគតិចដ៏មានឥទ្ធពលចំនួន ៣ក្រុម បានវាយដណ្ដើមគ្រប់គ្រងដែនដី ដោយធ្វើឲ្យរបបយោធាដែលកំពុងកាន់អំណាចរបស់រដ្ឋាភិបាល ពិបាកទប់ទល់នៅក្នុងការប្រយុទ្ធ ដែលបានបង្ខំឲ្យជនស៊ីវិលរាប់សែននាក់ភៀសខ្លួនចេញពីផ្ទះសម្បែងរបស់ពួកគេ។ យោងតាម UN បានឲ្យដឹងថា ប្រជាជនចំនួន ៣លាននាក់ បានផ្លាស់ទីលំនៅ នៅទូទាំងសហភាពមីយ៉ាន់ម៉ា ហើយប្រមាណជា ១៨,៦លាននាក់ ត្រូវការជំនួយមនុស្សធម៌។

លោកស្រី Bishop បានអំពាវនាវឲ្យបញ្ចប់អំពើហិង្សា ដោយសង្កត់ធ្ងន់ថា «អាចមានការវិវត្តន៍តិចតួច ក្នុងការដោះស្រាយតម្រូវការរបស់ប្រជាជន ខណៈជម្លោះប្រដាប់អាវុធបន្តមាននៅទូទាំងប្រទេស»៕