រយៈពេលជាង ១ឆ្នាំ ក្នុងសង្រ្គាម នៅតំបន់ហ្កាហ្សា ទាហានបម្រុងរបស់កងទ័ពអ៊ីស្រាអែល បានចាប់ផ្ដើមខ្សោះកម្លាំង ហើយកំពុងជួបការលំបាកក្នុងការជ្រើសរើសទាហានថ្មី នៅពេលដែលប្រទេសនេះបានបើកសមរភូមិថ្មី នៅប្រទេសលីបង់។

យោងតាមកងទ័ព បានឲ្យដឹងថា ទាហានបម្រុង ៣០០.០០០នាក់ ត្រូវបានកោះហៅ ចាប់តាំងពីមានការវាយប្រហាររបស់ក្រុមហាម៉ាស នៅថ្ងៃទី៧ ខែតុលា ឆ្នាំ២០២៣ ដោយ ១៨ភាគរយនៃពួកគេ គឺជាបុរសមានអាយុលើសពី ៤០ឆ្នាំដែលគួរតែរួចផុតពីកាតព្វកិច្ច។

ការចូលបម្រើយោធា គឺជាកាតព្វកិច្ច ចាប់ពីអាយុ ១៨ឆ្នាំ សម្រាប់ជនជាតិអ៊ីស្រាអែល ទាំងបុរស និងស្ត្រី ទោះបីជាមានការលើកលែងជាច្រើន ត្រូវបានអនុវត្តក៏ដោយ។ អ៊ីស្រាអែលកំពុងធ្វើសង្រ្គាមជាច្រើនសមរភូមិ ដោយប្រឆាំងនឹងក្រុមហាម៉ាស នៅតំបន់ហ្កាហ្សា និងក្រុមសកម្មប្រយុទ្ធហេសបូឡាគាំទ្រដោយអ៊ីរ៉ង់នៅលីបង់។

គិតចាប់តាំងពីយោធា បានចាប់ផ្តើមបើកការវាយលុកផ្លូវគោករបស់ខ្លួន នៅតំបន់ហ្កាហ្សា កាលពីថ្ងៃទី២៧ ខែតុលាឆ្នាំមុន អ៊ីស្រាអែលបានបាត់បង់ទាហាន ៣៦៧នាក់ នៅក្នុងយុទ្ធនាការនេះ ខណៈដែល ៣៧នាក់បានស្លាប់នៅលីបង់ ចាប់តាំងពីអ៊ីស្រាអែលបានចាប់ផ្តើមប្រតិបត្តិការជើងគោក នៅទីនោះ កាលពីថ្ងៃទី៣០ ខែកញ្ញា។

រយៈពេលនៃកាតព្វកិច្ចជាទាហានបម្រុង ត្រូវបានបន្លាយពេល ហើយកងកម្លាំងបម្រុងមួយចំនួនត្អូញត្អែរថា ពួកគេមិនអាចបន្តជីវិតធម្មតារបស់ពួកគេរហូតដល់រយៈពេល ៦ខែជាប់គ្នា៕